ជនចំណាកស្រុកប្រមាណ៦ម៉ឺននាក់ បានសម្រុកឆ្លងដែនចូលតំបន់ស្វយ័តសឺអ៊ូតា (Ceuta) របស់អេស្ប៉ាញ ដែលមានទីតាំងស្ថិតនៅភាគខាងជើងប្រទេសម៉ារ៉ុក ក្នុងរយៈពេលត្រឹមពីរទៅបីថ្ងៃ បង្កឱ្យអេស្ប៉ាញ និងសហភាពអឺរ៉ុបប្រឈមនឹងវិបត្តិចំណាកស្រុកដ៏ធ្ងន់ធ្ងរ។
ប្រភពពីសារព័ត៌មានAFP នៅថ្ងៃទី២ខែសីហា។
អាជ្ញាធរអេស្ប៉ាញបានឱ្យដឹងថា ចំនួនជនចំណាកស្រុកដែលចូលមកមានទំហំធំខ្លាំង បើប្រៀបធៀបនឹងប្រជាជនក្នុងតំបន់សឺអ៊ូតា ដែលមានប្រមាណ ៨ម៉ឺននាក់ប៉ុណ្ណោះ។ ក្នុងនោះ មនុស្សប្រហែល ២៥,០០០នាក់ បានវិលត្រឡប់ទៅប្រទេសម៉ារ៉ុកវិញរួចហើយ។
អ្នកជំនាញផ្នែកចំណាកស្រុកបានលើកឡើងថា ការសម្រុកចូលដ៏ច្រើននេះ អាចបណ្តាលមកពីការបន្ធូរបន្ថយការត្រួតពិនិត្យព្រំដែនរបស់កម្លាំងសន្តិសុខម៉ារ៉ុក។ ទោះជាយ៉ាងណា ភាគីម៉ារ៉ុកមិនទាន់ធ្វើការបកស្រាយជាផ្លូវការជុំវិញការចោទប្រកាន់នេះនៅឡើយទេ៕
