(សៀមរាប)៖ កម្ពុជាបានធ្វើជាម្ចាស់ផ្ទះ បើកកិច្ចប្រជុំកិច្ចសហប្រតិបត្ដិការអាស៊ាន មុខងារសាធារណៈលើកទី២៣(23d ACCSM)និងកិច្ចប្រជុំកិច្ចសហប្រតិបត្តិការអាស៊ានបូកបី ស្តីពីកិច្ចការមុខងារសាធារណៈលើកទី៨(8 ACCSM+3)និងព្រឹត្តិការណ៍ពាក់ព័ន្ធ។កិច្ចប្រជុំនេះធ្វើឡើងនៅខេត្ដសៀមរាប ចាប់ពីថ្ងៃទី០៣ដល់ថ្ងៃទី៥ ខែសីហា ឆ្នាំ២០២៦។
នៅថ្ងៃទី៣ ខែសីហា ឆ្នាំ២០២៦ ត្រូវថ្ងៃទី១ នៃកិច្ចប្រជុំនេះលោក យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ បានអញ្ជើញដឹកនាំកិច្ចប្រជុំកិច្ចសហប្រតិបត្តិការអាស៊ាន ស្តីពីកិច្ចការមុខងារសាធារណៈលើកទី២៣ ដែល កិច្ចប្រជុំនេះ ក៏មានចូលរួមពីបណ្តាមន្ត្រីជាន់ខ្ពស់ ACCSM, មន្ត្រីបង្គោល ACCSM និងលេខាធិការដ្ឋានអាស៊ាន។
ការបើកកិច្ចប្រជុំនេះលោក យក់ ប៊ុនណា បានដឹកនាំពិនិត្យ ពិភាក្សា និងសម្របសម្រួលលើឯកសារគតិយុត្តសំខាន់ៗ វឌ្ឍនភាពការងារនិងរបៀបវារៈនានា ជាមួយបណ្តាប្រធានប្រតិភូមន្ត្រីជាន់ខ្ពស់មកពីប្រទេសជាសមាជិកអាស៊ានទាំងអស់ ដើម្បីធានាឱ្យកិច្ចប្រជុំថ្នាក់រដ្ឋមន្ត្រី ដែលនឹងប្រព្រឹត្តទៅនៅថ្ងៃបន្តបន្ទាប់ ទទួលបានលទ្ធផលផ្លែផ្កា និងជោគជ័យខ្ពស់។កិច្ចប្រជុំនេះ ធ្វើឡើងក្នុងគោលបំណងពង្រឹងកិច្ចសហប្រតិបត្តិការ ផ្លាស់ប្តូរបទពិសោធនិងជំរុញការធ្វើនវានុវត្តន៍ក្នុងវិស័យមុខងារសាធារណៈរវាងបណ្តាប្រទេសជាសមាជិកអាស៊ាននិងប្រទេសដៃគូ ដើម្បីឆ្លើយតបទៅនឹងការផ្តល់សេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាព។
សូមរំលឹកថា ចាប់តាំងពីឆ្នាំ២០២៤-២០២៦ គឺជាលើកទី២ កម្ពុជាទទួលធ្វើជាប្រធានប្តូរវេនរៀបចំកិច្ចប្រជុំនេះជាថ្មី ក្រោមមូលបទ នវានុវត្តន៍សម្រាប់ការផ្តល់សេវាសាធារណៈឱ្យកាន់តែល្អប្រសើរឡើង ដែលទទួលបន្ទុករៀបចំដោយក្រសួងមុខងារសាធារណៈ។ការជ្រើសរើស មូលបទនេះ ក្នុងគោលបំណង ប្រមូលផ្តុំនិងចែករំលែកនូវពុទ្ធិនិងឧត្តមានុវត្តន៍ពាក់ព័ន្ធនឹងនវានុវត្តន៍ក្នុងការគ្រប់គ្រងនិងការផ្តល់សេវាសាធារណៈសម្រាប់ប្រទេសសមាជិកអាស៊ាននិងដៃគូ។ បង្កើនប្រសិទ្ធភាពក្នុងការអនុវត្តឯកសារណែនាំអាស៊ានស្តីពីការផ្តល់សេវាសាធារណៈ និងជំរុញការអនុវត្តនវានុវត្តន៍ក្នុងរដ្ឋបាលសាធារណៈ ដើម្បីបង្កើនគុណភាពនិងប្រសិទ្ធភាពសេវា ដែលផ្តល់ជូនដល់ប្រជាពលរដ្ឋ និងដៃគូសម្រេចឱ្យបាននូវគោលបំណងរបស់ផែនការការងារ ACCSM 2021-2025 ចក្ខុវិស័យសហគមន៍អាស៊ាន ២០២៥ និងចក្ខុវិស័យសហគមន៍ អាស៊ាន២០៤៥ ព្រមទាំង គោលដៅអភិវឌ្ឍន៍ប្រកបដោយចីរភាព (SDG)។ ការផ្តល់សេវាសាធារណៈប្រកបដោយគុណភាព ប្រសិទ្ធភាព និងស័ក្តសិទ្ធភាព គឺជាចំណុចស្នូលនៃទំនុកចិត្ត របស់ប្រជាពលរដ្ឋចំពោះរាជរដ្ឋាភិបាល និងជាកាតាលីករដ៏សំខាន់បំផុតមួយក្នុងការរក្សាសុខសន្តិភាពស្ថិរភាព និងការអភិវឌ្ឍសេដ្ឋកិច្ចសង្គម។ ដោយយោងលើសារៈសំខាន់នេះទាំងមន្ត្រីរាជការ ទាំងអង្គភាពផ្តល់សេវាសាធារណៈទាំងអស់ ត្រូវបន្តរិះរកនិងអនុវត្តវិធីសាស្ត្របំពេញការងារថ្មីៗ ដើម្បីពង្រឹងនិងលើកកម្ពស់ការផ្តល់សេវាសាធារណៈឱ្យកាន់តែល្អប្រសើរឡើងជាប្រចាំ និងត្រូវឆ្លើយតបនឹងសេចក្តីត្រូវការរបស់ ប្រជាជននៅគ្រប់កាលៈទេសៈ និងស្របទៅនឹងនិន្នាការនៃការវិវត្តនៃបច្ចេកវិទ្យា និងសេដ្ឋកិច្ចសង្គមជាតិ តំបន់ និងសកលលោក៕

