គណៈកម្មការកិច្ចការអ្នកជាប់ឃុំរបស់ប៉ាឡេស្ទីនបាននិយាយថា អ្នកជាប់ឃុំប៉ាឡេស្ទីននៅពន្ធនាគារ Megiddo ភាគខាងជើងអ៊ីស្រាអែល កំពុងប្រឈមនឹងការខ្វះអាហារ ការថែទាំសុខភាពមិនគ្រប់គ្រាន់ និងលក្ខខណ្ឌរស់នៅកាន់តែធ្ងន់ធ្ងរ។
ប្រភពពីសារព័ត៌មានAnadolu Agency នៅថ្ងៃទី៣ខែសីហា។
តាមគណៈកម្មការ អ្នកជាប់ឃុំមួយចំនួនបានស្រកទម្ងន់ដោយសារខ្វះអាហារ ខណៈការផ្គត់ផ្គង់សម្ភារៈអនាម័យ និងទឹកសម្រាប់ងូតមានកម្រិត។ អ្នកជាប់ឃុំក៏ត្រូវបានអនុញ្ញាតឱ្យចេញពីបន្ទប់ឃុំឃាំងក្នុងរយៈពេលខ្លី និងមិនទៀងទាត់ផងដែរ។
អង្គការសិទ្ធិអ្នកទោសប៉ាឡេស្ទីនបានអះអាងថា អ្នកជាប់ឃុំកំពុងប្រឈមនឹងការអត់ឃ្លាន ការមិនទទួលបានការព្យាបាលគ្រប់គ្រាន់ ការរំលោភបំពាន និងការដាក់ឱ្យនៅឯកោ ខណៈជំងឺស្បែកកមរមាស់កំពុងរីករាលដាល។ តាមក្រុមទាំងនេះ មនុស្សជាង ១០០នាក់បានស្លាប់ក្នុងការឃុំខ្លួនរបស់អ៊ីស្រាអែល ចាប់តាំងពីខែតុលា ឆ្នាំ២០២៣មក៕
