អាជ្ញាធរម៉ារ៉ុកបានឱ្យដឹងថា មនុស្សប្រមាណ ៤ម៉ឺននាក់បានព្យាយាមឆ្លងពីម៉ារ៉ុកចូលតំបន់ Ceuta ដែលស្ថិតក្រោមការគ្រប់គ្រងរបស់អេស្ប៉ាញ ក្នុងគោលបំណងបន្តដំណើរទៅកាន់អឺរ៉ុប។ ការប៉ុនប៉ងឆ្លងដែនទ្រង់ទ្រាយធំនេះបានបណ្តាលឱ្យមនុស្ស ១១នាក់ស្លាប់ ក្នុងនោះ ១០នាក់បានលង់ទឹក និងម្នាក់ទៀតបានធ្លាក់ពីតំបន់ថ្ម។
ប្រភពពីសារព័ត៌មានAnadolu Agency នៅថ្ងៃទី៣ខែសីហា។
ក្រសួងមហាផ្ទៃម៉ារ៉ុកបាននិយាយថា ការប៉ុនប៉ងឆ្លងដែននេះត្រូវបានជំរុញដោយព័ត៌មានមិនពិតតាមបណ្តាញសង្គម និងសកម្មភាពរបស់បណ្តាញជួញដូរមនុស្ស ដែលធ្វើឱ្យមនុស្សជាច្រើនជឿថា ពួកគេអាចចូលទៅអឺរ៉ុបបានដោយងាយ។
អាជ្ញាធរម៉ារ៉ុក និងអេស្ប៉ាញកំពុងសហការគ្នា ដើម្បីស្វែងរកព័ត៌មានបន្ថែមអំពីអ្នកស្លាប់ និងទប់ស្កាត់ការឆ្លងដែនខុសច្បាប់ ខណៈមនុស្សរាប់ម៉ឺននាក់នៅតែបន្តប្រមូលផ្តុំជិតព្រំដែន Ceuta៕
