ក្រុមតំណាងឲ្យអ្នកពន្លត់អគ្គិភ័យនៅបារាំងបានព្រមានថា អ្នកពន្លត់អគ្គិភ័យកំពុងប្រឈមនឹងបញ្ហាសុខភាព ដោយសារខ្វះឧបករណ៍ការពារពេលចុះពន្លត់ភ្លើងឆេះព្រៃ។ អ្នកពន្លត់អគ្គិភ័យខ្លះត្រូវប្រើតែក្រណាត់បិទមាត់ និងច្រមុះ ដើម្បីការពារពីផ្សែង។
ប្រភពពីសារព័ត៌មានAnadolu Agency នៅថ្ងៃទី៣ខែសីហា
ក្រុមតំណាងឲ្យអ្នកពន្លត់អគ្គិភ័យបានអំពាវនាវឱ្យរដ្ឋាភិបាលផ្តល់ឧបករណ៍ការពារឱ្យបានគ្រប់គ្រាន់ ព្រោះការស្រូបផ្សែងជាប្រចាំអាចបង្កបញ្ហាសុខភាពធ្ងន់ធ្ងរនៅពេលអនាគត។ ក្នុងប៉ុន្មានសប្តាហ៍កន្លងមក អ្នកពន្លត់អគ្គិភ័យ ៤នាក់បានស្លាប់ក្នុងពេលបំពេញការងារ។
បច្ចុប្បន្ន អ្នកពន្លត់អគ្គិភ័យរាប់ពាន់នាក់កំពុងប្រយុទ្ធនឹងភ្លើងឆេះព្រៃនៅតំបន់ជាច្រើនរបស់បារាំង។ ទោះបីស្ថានការណ៍ទូទៅត្រូវបានគ្រប់គ្រងក៏ដោយ អាជ្ញាធរបានព្រមានថា ស្ថានភាពអាចប្រែប្រួលបានយ៉ាងឆាប់រហ័ស៕
