(កណ្ដាល)៖ រដ្ឋបាលខេត្តកណ្ដាល នៅថ្ងៃទី៧ ខែសីហា ឆ្នាំ២០២៦ បានជូនដំណឹង ទៅកាន់ម្ចាស់សណ្ឋាគារ ផ្ទះសំណាក់ សូមកុំដំឡើងថ្លៃស្នាក់នៅអំឡុងពេល ប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)ដែលនឹងប្រព្រឹត្តទៅ នៅថ្ងៃទី១០-១១ ខែសីហា ឆ្នាំ២០២៦។
សេចក្តីជូនដំណឹងនោះបានលើកឡើងថា ម្ចាស់អាជីវកម្មទាំងអស់ ត្រូវបានណែនាំយ៉ាងម៉ឺងម៉ាត់ មិនឱ្យតម្លើងថ្លៃសេវាបន្ទប់ស្នាក់នៅ ម្ហូបអាហារ និងមិនត្រូវទទួលថតចម្លងនូវសំណៅឯកសារផ្សេងៗ ដែលពាក់ព័ន្ធនឹងការ ប្រឡងបាក់ឌុបជាដាច់ខាត។
វិធានការនេះ គឺដើម្បីជួយសម្រួលដល់បេក្ខជន និងអាណាព្យាបាល ក៏ដូចជាទប់ស្កាត់រាល់សកម្មភាពដែលអាចប៉ះពាល់ដល់ដំណើរការប្រឡងប្រកបដោយតម្លាភាព។
ឆ្នាំសិក្សា ២០២៥-២០២៦ ខេត្តកណ្ដាល មានបេក្ខជនចុះឈ្មោះប្រឡងសញ្ញាបត្រមធ្យមសិក្សាទុតិយភូមិសរុបចំនួន ១៣,៣០៤នាក់ ក្នុងនោះមានស្រី ៧,៥២៨នាក់។
បេក្ខជនទាំងអស់នឹង ត្រូវចូលរួមប្រឡងនៅតាមមណ្ឌលប្រឡងចំនួន ២០កន្លែង ស្មើនឹង៥៤២បន្ទប់ ដែលបានរៀបចំឡើងនៅតាមបណ្ដាក្រុង-ស្រុកចំនួន៧ ក្នុងខេត្តកណ្ដាល៕
