អ៊ីស្រាអែលបានបញ្ជាក់ថា អ្នកទោសប៉ាឡេស្ទីនម្នាក់ឈ្មោះ Ihab Mohammed Abdel Qader Diab អាយុ ៣៦ ឆ្នាំ មកពីតំបន់ហ្គាហ្សា បានស្លាប់នៅក្នុងការឃុំខ្លួន ប៉ុន្តែអាជ្ញាធរអ៊ីស្រាអែលទើបតែជូនដំណឹងអំពីការស្លាប់របស់គាត់ បន្ទាប់ពីជិត២ឆ្នាំ។
ប្រភពពីសារព័ត៌មានAl Jazeera នៅថ្ងៃទី១០ខែសីហា។
លោក Diab ត្រូវបានចាប់ខ្លួននៅខែធ្នូ ឆ្នាំ២០២៣ ហើយភាគីប៉ាឡេស្ទីនជឿថា លោកបានស្លាប់នៅខែកញ្ញា ឆ្នាំ២០២៤ បន្ទាប់ពីជាប់ឃុំប្រហែល៩ខែ។
អាជ្ញាធរអ៊ីស្រាអែលអះអាងថា លោកមានបញ្ហាសុខភាពពីមុន ប៉ុន្តែគ្រួសាររបស់លោកបានបដិសេធ ដោយនិយាយថា លោកមានសុខភាពល្អនៅពេលចាប់ខ្លួន។ គ្រួសារក៏បានចោទប្រកាន់ថា លោកអាចត្រូវបានធ្វើទារុណកម្មក្នុងពន្ធនាគារ៕
