ប្រព័ន្ធផ្សព្វផ្សាយអ៊ីស្រាអែលបានរាយការណ៍ថា នាយករដ្ឋមន្ត្រីអ៊ីស្រាអែល លោកBenjamin Netanyahu និងរដ្ឋមន្ត្រីការពារជាតិ Israel Katz បានអនុម័តដោយមិនប្រកាសជាសាធារណៈ ឲ្យចាប់ផ្តើមការងារសាងសង់ហេដ្ឋារចនាសម្ព័ន្ធឡើងវិញនៅតំបន់មួយក្នុងទីក្រុង Rafah ភាគខាងត្បូងហ្គាហ្សា ដែលស្ថិតក្រោមការគ្រប់គ្រងរបស់កងទ័ពអ៊ីស្រាអែល។
ប្រភពពីសារព័ត៌មានAl Jazeera នៅថ្ងៃទី១០ខែសីហា។
តំបន់នេះមានឈ្មោះថាGreen Rafahហើយគ្រោងបង្កើតជាតំបន់លំនៅឋានសម្រាប់ជនប៉ាឡេស្ទីន ដែលមិនស្ថិតក្រោមការគ្រប់គ្រងរបស់ Hamas។ ការងារដំបូងនឹងរួមមានការជីកដី និងភ្ជាប់ប្រព័ន្ធអគ្គិសនី ទឹក និងលូ។ ប្រភពអ៊ីស្រាអែលនិយាយថា កម្មករប៉ាឡេស្ទីនមកពីហ្គាហ្សានឹងចូលរួមការងារ បន្ទាប់ពីឆ្លងកាត់ការត្រួតពិនិត្យសន្តិសុខ។
ទោះជាយ៉ាងណា ការិយាល័យរបស់ Netanyahu បានបដិសេធថា របាយការណ៍នេះបង្ហាញព័ត៌មានមិនត្រឹមត្រូវ ហើយថាគម្រោងនេះជាគម្រោងសាកល្បងរបស់អារ៉ាប់រួម ដែលបានដំណើរការអស់រយៈពេលជាច្រើនខែមកហើយ៕
