(ភ្នំពេញ)៖ លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានថ្លែងថា បេក្ខជនដែលមានបញ្ហាសុខភាព សរុបចំនួន៩៦នាក់ ក្នុងនោះអ្នកដែលបោះបង់ការប្រឡងមានចំនួន១១នាក់ ហើយបេក្ខជនប្រឡងដាច់ដោយឡែកមានចំនួន ២៤នាក់.!។
លោកស្រីបញ្ជាក់ថា តាមទិន្នន័យបឋមនៅក្នុងព្រឹកថ្ងៃទី១នេះ មានបេក្ខជនអវត្តមានចំនួន ១.២៩៤នាក់ ក្នុងនោះស្រីចំនួន៤៧៤នាក់ ស្មើនឹង ០,៨៥% ហើយក្នុងចំណោមបេក្ខជនអវត្តមានសរុប គឺមានបេក្ខជនស្វ័យរិន្ទចំនួន ១.១០០នាក់។
ក្នុងចំណោមបេក្ខជន ដែលមានបញ្ហាសុខភាព មានបេក្ខជនដែលមានជំងឺគ្រុនឈាមចំនួន ២៧នាក់ និងគ្រោះថ្នាក់ចរាចរណ៍ចំនួន ២នាក់ ដោយឡែកគណៈកម្មាធិការប្រឡងដែលមានបញ្ហាសុខភាពមានចំនួនសរុប ១៩នាក់។
លោកស្រីបន្តទៀតថា តាមទិន្នន័យខាងលើនេះ បានបង្ហាញថា ចំនួនបេក្ខជនដែលអវត្តមាននៅក្នុងឆ្នាំ២០២៦។
គឺមានចំនួនតិចជាងបេក្ខជនអវត្តមាននៅក្នុងឆ្នាំ២០២៥ ខណៈពេលដែលនៅក្នុងឆ្នាំ២០២៥ កន្លងមក បេក្ខជនអវត្តមានសរុបមានចំនួន ១.៧៨៨នាក់ ស្មើនឹង ១,២២% នៃចំនួនបេក្ខជនសរុបដែលប្រឡងនៅក្នុង ឆ្នាំ២០២៥។
ដំណើរការប្រឡងមួយព្រឹកថ្ងៃទី១០ ខែសីហា ឆ្នាំ២០២៦ គណៈមេប្រយោគទូទាំងប្រទេសប្រចាំខេត្តសៀមរាប និងក្រុមការងារសង្កេតការណ៍ របស់អង្គភាពប្រឆាំងអំពើពុករលួយ (ACU) បានសម្រេចធ្វើកំណត់ហេតុពិសេស ករណីគណៈកម្មការប្រឡងចំនួន ០៣រូប ពាក់នាឡិកាឆ្លាតវៃ (Smart Watch)ក្នុងពេលកំពុងដំណើរការប្រឡង។
ក្នុងនោះសមាជិកគណៈកម្មការកណ្ដាល២រូប នៅមណ្ឌលវិទ្យាល័យ ហ៊ុន សែន សៀមរាប និងសមាជិកគណៈកម្មការត្រួតពិនិត្យអគារ ១រូប នៅមណ្ឌល វិទ្យាល័យ ហ៊ុន សែន វត្តស្វាយត្បូង។
ក្នុងឆ្នាំសិក្សា ២០២៥-២០២៦ បេក្ខជនចុះឈ្មោះប្រឡងសរុប ១៥១,២៣៨នាក់ (ស្រី ៨៤,៧៣៥នាក់)។
បេក្ខជនថ្នាក់វិទ្យាសាស្រ្ត មានចំនួន ៣៧,៤៤៥ នាក់ ស្មើនឹង ២៤,៧៦% និងបេក្ខជនថ្នាក់វិទ្យាសាស្រ្តសង្គម មានចំនួន ១១៣,៧៩៣នាក់ ស្មើនឹង ៧៥,២៤%ឯណោះ៕
