កាលពីថ្ងៃទី១៣ ខែសីហា ឆ្នាំ២០២៦ អ៊ុយក្រែនបានផ្ញើសំណើទៅរុស្ស៊ី ដើម្បីឱ្យភាគីទាំងពីរផ្អាកការវាយប្រហារលើគោលដៅស៊ីវិលនៅសមុទ្រខ្មៅ ខណៈការវាយប្រហារកាន់តែខ្លាំងលើនាវា និងកំពង់ផែ កំពុងរំខានដល់ការនាំចេញ និងបង្កើនការព្រួយបារម្ភអំពីការផ្គត់ផ្គង់ស្បៀងអាហារពិភពលោក។
ប្រភពពីសារព័ត៌មានReuter។
តាមប្រភពដែលដឹងពីបញ្ហានេះ សំណើរបស់អ៊ុយក្រែនត្រូវបានបញ្ជូនទៅរុស្ស៊ីតាមរយៈភាគីទីបី ហើយរហូតមកដល់ពេលនេះ ក្រុងកៀវនៅកំពុងរង់ចាំការឆ្លើយតបពីទីក្រុងម៉ូស្គូ។
រុស្ស៊ី និងអ៊ុយក្រែនសុទ្ធតែជាប្រទេសសំខាន់ក្នុងទីផ្សារកសិកម្មពិភពលោក ហើយភាគីទាំងពីរបានចោទប្រកាន់គ្នាទៅវិញទៅមកថា បានបង្កើនការវាយប្រហារលើនាវាដែលពាក់ព័ន្ធនឹងការនាំចេញ។ ការរំខានដល់ការដឹកជញ្ជូនតាមសមុទ្រខ្មៅអាចប៉ះពាល់ដល់លំហូរគ្រាប់ធញ្ញជាតិ និងទំនិញកសិកម្មទៅកាន់ទីផ្សារអន្តរជាតិ។
ការស្នើផ្អាកការវាយប្រហារនេះ គឺជាការប៉ុនប៉ងកាត់បន្ថយហានិភ័យនៅសមុទ្រខ្មៅ និងរក្សាលំហូរពាណិជ្ជកម្មស្បៀងអាហារ ខណៈស្ថានការណ៍នៅតំបន់នេះកំពុងមានភាពតានតឹងកាន់តែខ្លាំង៕
