ប្រទេសសម្ព័ន្ធមិត្តរបស់សហរដ្ឋអាមេរិកនៅតំបន់ឈូងសមុទ្រកំពុងបង្ហាញការមិនពេញចិត្តកាន់តែខ្លាំង ចំពោះការដែលសង្គ្រាមជាមួយអ៊ីរ៉ង់អូសបន្លាយ និងមិនទាន់មានដំណោះស្រាយការទូតច្បាស់លាស់។
ប្រភពពីសារព័ត៌មានAnadolu Agency នៅថ្ងៃទី១៦ខែសីហា។
តាមរបាយការណ៍ប្រព័ន្ធផ្សព្វផ្សាយអាមេរិក អារ៉ាប៊ីសាអូឌីត អេមីរ៉ាតអារ៉ាប់រួម កាតា គុយវ៉ែត និងបារ៉ែន កំពុងបង្កើនការរិះគន់ចំពោះរដ្ឋបាលប្រធានាធិបតី Donald Trump ខណៈការវាយប្រហារដោយមីស៊ីល និងដ្រូនពីអ៊ីរ៉ង់ និងក្រុមសម្ព័ន្ធមិត្តរបស់ខ្លួននៅតែបន្ត។
ប្រទេសមួយចំនួនក្នុងតំបន់ក៏ចាប់ផ្តើមពិចារណាឡើងវិញអំពីអត្ថប្រយោជន៍នៃការអនុញ្ញាតឱ្យសហរដ្ឋអាមេរិកបន្តដាក់មូលដ្ឋានយោធាធំៗនៅលើទឹកដីរបស់ពួកគេ។ ទោះជាយ៉ាងណា អ្នកការទូតលោកខាងលិចម្នាក់បានព្រមានថា ស្ថានការណ៍នេះមិនទាន់មានន័យថា ទំនាក់ទំនងជាមួយអាមេរិកកំពុងផ្លាស់ប្តូរយ៉ាងធ្ងន់ធ្ងរនោះទេ។ទោះមានការខកចិត្តកាន់តែខ្លាំង ប្រទេសឈូងសមុទ្រនៅតែពឹងផ្អែកលើសហរដ្ឋអាមេរិកសម្រាប់សន្តិសុខ រួមទាំងសព្វាវុធ គ្រាប់រំសេវ និងព័ត៌មានស៊ើបការណ៍៕
