អ៊ុយក្រែនបានធ្វើការវាយប្រហារតាមអាកាសចម្ងាយឆ្ងាយជាបន្តបន្ទាប់ទៅលើគោលដៅនៅក្នុងប្រទេសរុស្ស៊ី ដោយរួមមានមូលដ្ឋានទ័ពអាកាស និងមជ្ឈមណ្ឌលបច្ចេកវិទ្យារ៉ុក្កែតដែលពាក់ព័ន្ធនឹងប្រព័ន្ធអ៊ីនធឺណិតផ្កាយរណបរបស់រុស្ស៊ី។
ប្រភពពីសារព័ត៌មានAl Jazeera នៅថ្ងៃទី១៦ខែសីហា។
ប្រធានាធិបតីអ៊ុយក្រែន Volodymyr Zelenskyy បាននិយាយថា កងកម្លាំងអ៊ុយក្រែនបានប្រើមីស៊ីលបាញ់ពីចម្ងាយ Flamingo ផលិតក្នុងស្រុក ដើម្បីវាយប្រហារមជ្ឈមណ្ឌលរ៉ុក្កែត Progress របស់ទីភ្នាក់ងារអវកាសរុស្ស៊ី Roscosmos។ ទីតាំងនេះស្ថិតនៅប្រមាណ ៩០០គីឡូម៉ែត្រពីព្រំដែនអ៊ុយក្រែន។
អ៊ុយក្រែនក៏បានវាយប្រហារមូលដ្ឋានទ័ពអាកាស Savasleyka ដែលស្ថិតនៅចម្ងាយប្រមាណ ៧០០គីឡូម៉ែត្រពីព្រំដែន។ លោក Zelenskyy បាននិយាយថា ការវាយប្រហាររយៈចម្ងាយគឺមានគោលបំណងកាត់បន្ថយសមត្ថភាពយោធារបស់រុស្ស៊ី និងបង្ហាញពីផលប៉ះពាល់នៃសង្គ្រាមនៅក្នុងទឹកដីរុស្ស៊ី។
ជាមួយគ្នានេះ មូស្គូកំពុងទាមទារការបំភ្លឺពីទីក្រុងវ៉ាស៊ីនតោន និងអង់ការ៉ា ជុំវិញផែនការដែលអាចផ្ញើឃ្លាំងអាវុធ និងគ្រាប់រំសេវអាមេរិកក្នុងបរិមាណច្រើន ដែលកំពុងរក្សាទុកនៅប្រទេសតួកគី ទៅឱ្យអ៊ុយក្រែន៕
