កាលពីថ្ងៃទី១៦ សីហា ២០២៦ ប្រព័ន្ធផ្សព្វផ្សាយផ្លូវការរបស់ប៉ាឡេស្ទីនWafa បានរាយការណ៍ថា ជនជាតិអ៊ីស្រាអែលបានដាក់តង់នៅតំបន់Wadi Zeytun ភាគពាយ័ព្យទីក្រុងរ៉ាម៉ាល់ឡា ក្នុងគោលបំណងបង្កើតទីតាំងតាំងទីលំនៅថ្មីនៅលើដីប៉ាឡេស្ទីនក្នុងតំបន់ West Bank ដែលកាន់កាប់។
ប្រភពពីសារព័ត៌មានAnadolu Agency។
តាមWafa ប្រសិនបើការបង្កើតទីតាំងនេះទទួលបានជោគជ័យ ចំនួនទីតាំងតាំងទីលំនៅក្នុងតំបន់នោះនឹងកើនឡើងដល់ ៦ កន្លែង។ សកម្មភាពនេះកើតឡើងស្របពេលដែលការវាយប្រហារ និងការរំខានលើប្រជាជនប៉ាឡេស្ទីន និងទ្រព្យសម្បត្តិរបស់ពួកគេនៅតំបន់ West Bank ត្រូវបានរាយការណ៍ថាកាន់តែខ្លាំងឡើង។
ការពង្រីកទីតាំងតាំងទីលំនៅរបស់អ៊ីស្រាអែលនៅតំបន់ West Bank និងទីក្រុងហ្សេរុយសាឡឹមខាងកើត គឺជាបញ្ហាដ៏ចម្រូងចម្រាសក្នុងជម្លោះអ៊ីស្រាអែល-ប៉ាឡេស្ទីន។ អង្គការសហប្រជាជាតិចាត់ទុកទីតាំងតាំងទីលំនៅរបស់អ៊ីស្រាអែលនៅក្នុងដែនដីប៉ាឡេស្ទីនដែលកាន់កាប់ថា ខុសច្បាប់ក្រោមច្បាប់អន្តរជាតិ៕
