(ខេត្តក្រចេះ)៖ នៅថ្ងៃទី១៨ ខែសីហា ឆ្នាំ២០២៦ លោកឯកឧត្តម ឌិត ទីណា រដ្ឋមន្ត្រីក្រសួងកសិកម្ម និង លោកឯកឧត្តម Igor Driesmans ឯកអគ្គរដ្ឋទូតសហភាពអឺរ៉ុប (EU) ប្រចាំកម្ពុជា បានដឹកនាំគណៈប្រតិភូជាន់ខ្ពស់ ចុះពិនិត្យលទ្ធផលនៃកិច្ចសហប្រតិបត្តិការអភិរក្សសត្វផ្សោតទន្លេមេគង្គ នៅអន្លង់ផ្សោតកាំពី ស្ថិតក្នុង ខេត្តក្រចេះ។ កិច្ចប្រតិបត្តិការអភិរក្ស(រតនសម្បត្តិជាតិ)នេះសម្រេចបានក្រោមការសហការរវាងអគ្គនាយកដ្ឋានជលផល និងអង្គការ WWF ដោយមានការគាំទ្រពីប្រទេសបែលហ្ស៊ិក ក្រុមអឺរ៉ុប និងដៃគូអភិវឌ្ឍន៍នានា។
កិច្ចសហប្រតិបត្តិការ អភិរក្សសត្វផ្សោតផ្តោតលើការបង្កើតតុល្យភាពរវាងការការពារសត្វផ្សោត និងការលើកស្ទួយជីវភាពប្រជានេសាទ តាមរយៈការបង្កើតមុខរបរថ្មីៗ ដើម្បីកាត់បន្ថយការពឹងផ្អែកលើផលនេសាទ និងជំរុញឱ្យសហគមន៍ចូលរួមទប់ស្កាត់បទល្មើសជលផលប្រកបដោយចីរភាព៕
