រដ្ឋមន្ត្រីក្រសួងថាមពលអាមេរិក លោក Chris Wright បាននិយាយថា រដ្ឋាភិបាលលោក Donald Trump នឹងប្រកាសវិធានការថ្មីៗក្នុងរយៈពេលប៉ុន្មានថ្ងៃខាងមុខ ដើម្បីជួយបង្កើនការផលិតប្រេងឥន្ធនៈ និងទប់ការឡើងថ្លៃសាំងនៅអាមេរិក។
ប្រភពពីសារព័ត៌មានReuter នៅថ្ងៃទី១៨ខែសីហា។
បច្ចុប្បន្ន តម្លៃសាំងនៅអាមេរិកបានកើនឡើងខ្ពស់ ដោយតម្លៃសាំងធម្មតាជាមធ្យមឡើងដល់ជាង ៤.០៦ ដុល្លារក្នុងមួយហ្គាឡុង។ លោក Wright បញ្ជាក់ថា រោងចក្រចម្រាញ់ប្រេងនៅអាមេរិកកំពុងដំណើរការក្នុងកម្រិតខ្ពស់ ប៉ុន្តែការផ្គត់ផ្គង់ប្រេងនៅតំបន់មជ្ឈិមបូព៌ាកំពុងរងការរំខាន។
ស្ថានការណ៍សង្គ្រាម និងភាពតានតឹងនៅមជ្ឈិមបូព៌ា បានធ្វើឱ្យទីផ្សារប្រេងពិភពលោកមានភាពមិនប្រាកដប្រជា ហើយជំរុញឱ្យតម្លៃប្រេងឥន្ធនៈកើនឡើង។
រដ្ឋាភិបាលអាមេរិកកំពុងជួបពិភាក្សាជាមួយក្រុមហ៊ុនចម្រាញ់ប្រេង ដើម្បីរកវិធីបង្កើនការផលិត និងធានាថាមានប្រេងឥន្ធនៈគ្រប់គ្រាន់សម្រាប់ប្រើប្រាស់។ គោលបំណងសំខាន់ គឺកាត់បន្ថយសម្ពាធលើតម្លៃសាំង និងការពារអ្នកប្រើប្រាស់អាមេរិកពីការឡើងថ្លៃបន្ថែមទៀត៕
