(ភ្នំពេញ)៖ យោងតាមសេចក្តីប្រកាសព័ត៌មានរបស់ ក្រុមការងារចំពោះកិច្ចគ្រប់គ្រងមូលនិធិកសាង ហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន (ក.គ.ម) នៅថ្ងៃទី១៨ ខែសីហា ឆ្នាំ២០២៦បានបញ្ជាក់ឱ្យដឹងថា គម្រោងស្ថាបនាផ្លូវក្រវាត់ព្រំដែនកម្ពុជា ក្រោមមូលនិធិកសាងហេដ្ឋារចនាសម្ព័ន្ធតាមព្រំដែន(ក.គ.ម) សម្រេចបានលទ្ធផលរហូតដល់៩៨,៨៧%។
លើផែនការផ្លូវសរុបប្រវែង២៦៤,៤០ គីឡូម៉ែត្រ គិតចាប់ពីខែធ្នូ ឆ្នាំ២០២៤ ដល់ថ្ងៃទី១៣ ខែសីហា ឆ្នាំ២០២៦ ហើយការសម្រេចបានលទ្ធផលយ៉ាងឆាប់រហ័សនេះ ។
គឺបានមកពីការប្រកៀកស្មាគ្នារវាងកងកម្លាំងវិស្វកម្ម និងការចូលរួមថវិកាផ្ទាល់ពីប្រជាពលរដ្ឋខ្មែរ ដោយអនុវត្តយ៉ាងម៉ឺងម៉ាត់តាមអនុសាសន៍ណែនាំរបស់ សម្តេចបតី ហ៊ុន ម៉ាណែត នាយករដ្ឋមន្ត្រីប្រកបដោយតម្លាភាព និងសន្សំសំចៃខ្ពស់។
នៅក្នុងដំណើរការកសាងប្រមាណ ២០ ខែកន្លងមកនេះ ក្រុមការងារបានបោសសម្អាតមីន និងយុទ្ធភណ្ឌមិនទាន់ផ្ទុះប្រកបដោយសុវត្ថិភាពលើផ្ទៃដីជាង ៦,៦ លានម៉ែត្រការ៉េ ដោយប្រមូលបានគ្រាប់គ្រប់ប្រភេទ១០៦ គ្រាប់ (រួមទាំងគ្រាប់បែកចង្កោម ៤៣ គ្រាប់)។
ជាមួយគ្នានេះកម្លាំងវិស្វកម្ម៨ កងឯកភាព រួមជាមួយគ្រឿងចក្រ ២៨៦ គ្រឿង បានប្រយុទ្ធក្តៅគគុកនៅលើសមរភូមិការដ្ឋាន។
ដោយស្ថាបនាផ្លូវក្នុងខេត្តមណ្ឌលគិរីបាន ១០% រួចរាល់ស្ថាពរ និងខេត្តរតនគិរីសម្រេចបាន ៩៧,៦៣% ហើយសមិទ្ធផលជាប្រវត្តិសាស្ត្រដ៏សំខាន់មួយ គឺកាលពីថ្ងៃទី៤ ខែកក្កដា ឆ្នាំ២០២៥ កងកម្លាំងបានឈូសបើកផ្លូវរហូតទៅដល់បង្គោលលេខ០ (តំបន់កន្ទុយនាគ) ដែលជាចំណុចប្រសព្វព្រំដែនប្រទេសទាំងបី កម្ពុជា ឡាវ និងវៀតណាម។
ក្រៅពីការកសាងតួផ្លូវ និងការចាក់ក្រាលល្បាយកម្ទេចថ្មកិនបង្ហាប់ ក្រុមការងារក៏បានសង់រួចរាល់នូវសំណង់សិល្បការ្យជាច្រើន រួមមាន លូប្រអប់ ៥៤ កន្លែង លូមូល ៤៨៤ កន្លែង, ស្ពានបេតុង២ កន្លែង សំណង់បេតុងរក្សាទឹក ១៤ កន្លែង ព្រមទាំងបានដាំដើមត្នោតដែលជាអត្តសញ្ញាណជាតិបានចំនួន ៥.១៦៦ ដើម នៅតាមបណ្តោយព្រំដែន។
បច្ចុប្បន្ន ក្រុមការងារកំពុងបន្តថែទាំផ្លូវក្នុងខេត្តមណ្ឌលគិរី ដើម្បីការពារការខូចខាតក្នុងរដូវវស្សា និងជំរុញការស្ថាបនាផ្នែកដែលនៅសល់ក្នុងខេត្តរតនគិរី ឱ្យបានរួចរាល់នាពេលឆាប់ៗខាង៕
