អង្គការសុខភាពពិភពលោក (WHO) បានព្រមានថា ការផ្ទុះជំងឺEbola នៅសាធារណរដ្ឋប្រជាធិបតេយ្យកុងហ្គោ (DRC) នៅតែជាភាពអាសន្នផ្នែកសុខភាពពិភពលោក ខណៈចំនួនអ្នកឆ្លងបានកើនលើស ៥,០០០នាក់។
ប្រភពពីសារព័ត៌មានAl Jazeera នៅថ្ងៃទី១៩ខែសីហា។
ក្រោយកិច្ចប្រជុំបន្ទាន់កាលពីថ្ងៃទី១៨ ខែសីហា អគ្គនាយក WHO លោក Tedros Adhanom Ghebreyesus បានអំពាវនាវឱ្យសហគមន៍អន្តរជាតិបង្កើនការគាំទ្រ ដើម្បីទប់ស្កាត់ការរីករាលដាល។ ការផ្ទុះជំងឺនេះបានបណ្តាលឱ្យមនុស្សស្លាប់ជាង ២,៣២០នាក់ ហើយត្រូវបានចាត់ទុកថា ជាការផ្ទុះ Ebola ដែលមានអ្នកស្លាប់ច្រើនបំផុតក្នុងប្រវត្តិសាស្ត្ររបស់ DRC។
លោក Tedros បាននិយាយថា ការរីករាលដាលនៅមិនទាន់ស្ថិតក្រោមការគ្រប់គ្រងនៅឡើយទេ ហើយក្រុមសុខាភិបាលនៅតែរកឃើញខ្សែសង្វាក់នៃការឆ្លងថ្មីៗ ដែលត្រូវបញ្ឈប់ ដើម្បីទប់ស្កាត់ជំងឺនេះ។
ការឆ្លើយតបនឹងការផ្ទុះជំងឺក៏ប្រឈមនឹងបញ្ហាជាច្រើន ដូចជា ជម្លោះប្រដាប់អាវុធ ព័ត៌មានមិនពិត ការមិនទុកចិត្តលើបុគ្គលិកសុខាភិបាល និងទំនៀមទម្លាប់ក្នុងសហគមន៍។ លើសពីនេះ ជំងឺ Ebola ប្រភេទ Bundibugyo ដែលកំពុងរាតត្បាតនេះ មិនទាន់មានវ៉ាក់សាំង ឬថ្នាំព្យាបាលដែលត្រូវបានអនុម័តជាក់លាក់នៅឡើយ៕
