អេមីរ៉ាតអារ៉ាប់រួម (UAE) បានប្រកាសផ្អាកពាណិជ្ជកម្ម និងប្រតិបត្តិការហិរញ្ញវត្ថុជាមួយអ៊ីរ៉ង់ដោយមិនកំណត់ពេល បន្ទាប់ពីចោទប្រកាន់ថា អ៊ីរ៉ង់បានបាញ់មីស៊ីលបាលីស្ទិកពីរគ្រាប់ចូលមកក្នុងទឹកដីរបស់ខ្លួន។
ប្រភពពីសារព័ត៌មានAl Jazeera នៅថ្ងៃទី១៩ខែសីហា។
ក្រសួងការបរទេស UAE បានប្រកាសថា រាល់ការធ្វើពាណិជ្ជកម្ម ការផ្លាស់ប្តូរពាណិជ្ជកម្ម និងប្រតិបត្តិការហិរញ្ញវត្ថុជាមួយអ៊ីរ៉ង់ ត្រូវបានផ្អាករហូតដល់មានការជូនដំណឹងថ្មី។ UAE អះអាងថា ការសម្រេចចិត្តនេះធ្វើឡើងដោយសារការកើនឡើងនៃភាពតានតឹង ដែលអាចប៉ះពាល់ដល់សន្តិភាព និងសន្តិសុខក្នុងតំបន់។
ទោះជាយ៉ាងណា អ៊ីរ៉ង់បានបដិសេធថាមិនបានបាញ់មីស៊ីលទៅ UAE ទេ ហើយបានចោទប្រកាន់ថា ហេតុការណ៍នេះអាចជា “ប្រតិបត្តិការបំភាន់មុខ” ដែលពាក់ព័ន្ធនឹងអ៊ីស្រាអែល និងសហរដ្ឋអាមេរិក។
អ្នកវិភាគចាត់ទុកវិធានការរបស់ UAE ថាមានសារៈសំខាន់ខ្លាំងសម្រាប់អ៊ីរ៉ង់ ព្រោះអ៊ីរ៉ង់ពឹងផ្អែកលើ UAE សម្រាប់ការនាំចូលទំនិញសំខាន់ៗ និងការចូលដំណើរការទីផ្សារហិរញ្ញវត្ថុអន្តរជាតិ។ ដូច្នេះ ការបិទផ្លូវពាណិជ្ជកម្មនេះអាចបង្កសម្ពាធបន្ថែមលើសេដ្ឋកិច្ចអ៊ីរ៉ង់៕
