ឯកសារដែលទទួលបានដោយ Al Jazeera បង្ហាញថា មន្ទីរបញ្ចកោណអាមេរិកបានផ្ញើសំណួរជាច្រើនទៅកាន់ប្រទេសជាសមាជិក NATO ដើម្បីវាយតម្លៃថា តើប្រទេសទាំងនោះកំពុងគាំទ្រ និងអនុវត្តតាមទស្សនៈរបស់ប្រធានាធិបតី ដូណាល់ ត្រាំ ចំពោះសម្ព័ន្ធមិត្តឆ្លងមហាសមុទ្រអាត្លង់ទិកដែរឬទេ។
ប្រភពពីសារព័ត៌មានAl Jazeera នៅថ្ងៃទី២០ខែសីហា។
ក្នុងឯកសារ មន្ទីរបញ្ចកោណបានសួរថា តើប្រទេសសមាជិក NATO បានបង្ហាញការគាំទ្រជាសាធារណៈចំពោះអាទិភាពគោលនយោបាយការបរទេសរបស់អាមេរិកដែរឬទេ។ សំណួរមួយទៀតសួរថា តើប្រទេសនោះមានជំហរស្របតាមវិធីសាស្ត្ររបស់អាមេរិកដែលត្រូវ “រឹងមាំ ច្បាស់លាស់ និងស្ងាត់ស្ងៀម” ដែរឬទេ។
សំណួរដែលមានលក្ខណៈនយោបាយខ្លាំងបំផុត គឺពាក់ព័ន្ធនឹងការអនុញ្ញាតឱ្យអាមេរិកប្រើប្រាស់មូលដ្ឋានយោធា និងដែនអាកាសរបស់ប្រទេសសម្ព័ន្ធមិត្ត។ មន្ទីរបញ្ចកោណបានសួរថា តើប្រទេសទាំងនោះបានដាក់កំហិតលើការប្រើប្រាស់មូលដ្ឋាន និងការហោះហើររបស់យោធាអាមេរិកឬអត់ ហើយថាតើពួកគេមានបំណងកាត់បន្ថយ ឬលុបចោលកំហិតទាំងនោះដែរឬទេ។
អ្នកជំនាញយល់ថា ឯកសារនេះបង្ហាញពីការខិតខំរបស់រដ្ឋបាលលោក ត្រាំ ក្នុងការចង់ឱ្យសម្ព័ន្ធមិត្តអាមេរិកចូលរួម និងគាំទ្រកាន់តែច្រើនចំពោះសង្គ្រាមជាមួយអ៊ីរ៉ង់ ទោះបីជាជម្លោះនេះមិនស្ថិតនៅក្នុងវិសាលភាពនៃកាតព្វកិច្ចការពាររួមរបស់ NATO ក៏ដោយ៕
