អ៊ីស្រាអែល ប្រើកាំភ្លើងធំវាយប្រហារលើដីកសិកម្មនៅខេត្ត Quneitra ភាគខាងត្បូងប្រទេសស៊ីរី កាលពីថ្ងៃព្រហស្បតិ៍ទី២០ខែសីហា បណ្តាលឱ្យកើតមានអគ្គិភ័យ។
ប្រភពពីសារព័ត៌មានAnadolu Agency។
តាមប្រភពដដែល កងកម្លាំងអ៊ីស្រាអែលបានបាញ់គ្រាប់កាំភ្លើងធំមួយគ្រាប់ទៅតំបន់ភាគខាងត្បូងភូមិ Jabata al-Khashab និងបាញ់គ្រាប់បំភ្លឺលើតំបន់នោះ។ ការបាញ់ប្រហារបានបង្កឱ្យភ្លើងឆេះលើផ្ទៃដីកសិកម្ម។
ហេតុការណ៍នេះកើតឡើងមួយថ្ងៃបន្ទាប់ពីកងកម្លាំងអ៊ីស្រាអែលបានចូលប្រតិបត្តិការនៅ Jabata al-Khashab និងឃាត់ខ្លួនមនុស្សពីរនាក់។ កាលពីថ្ងៃអង្គារ យន្តហោះចម្បាំងអ៊ីស្រាអែលក៏បានធ្វើការវាយប្រហារតាមអាកាសចំនួន ៨ លើផ្លូវរត់នៃមូលដ្ឋានទ័ពអាកាស Abu al-Duhur ក្នុងខេត្ត Idlib ភាគពាយ័ព្យស៊ីរី ដោយបណ្តាលឱ្យខូចខាតហេដ្ឋារចនាសម្ព័ន្ធ។
រដ្ឋាភិបាលស៊ីរីបានដាក់លិខិតតវ៉ាទៅអង្គការសហប្រជាជាតិ និងក្រុមប្រឹក្សាសន្តិសុខ ដោយចោទថា ការវាយប្រហារ ការចូលលុកលុយ និងការចាប់ខ្លួនរបស់អ៊ីស្រាអែលកំពុងរារាំងកិច្ចខិតខំប្រឹងប្រែងស្តារស្ថិរភាព និងបង្កើនហានិភ័យនៃភាពតានតឹងក្នុងតំបន់៕
