កាលពីថ្ងៃទី២០ ខែសីហា ឆ្នាំ២០២៦ ស្ថានការណ៍នៅយេម៉ែនកំពុងកាន់តែតានតឹង ខណៈកងកម្លាំងរដ្ឋាភិបាល និងក្រុមហ៊ូទីបានបង្កើនការវាយប្រហារទៅលើទីតាំងរបស់គ្នាទៅវិញទៅមក ដែលបង្កើនការព្រួយបារម្ភថា ប្រទេសនេះអាចវិលត្រឡប់ទៅរកសង្គ្រាមពេញទំហឹង។
ប្រភពពីសារព័ត៌មានAl Jazeera។
អ្នកនាំពាក្យរដ្ឋាភិបាលយេម៉ែន Majed Abdullah al-Nuzaili បាននិយាយថា ក្នុងរយៈពេល ២៤ ម៉ោង កងកម្លាំងរដ្ឋាភិបាលបានធ្វើការវាយប្រហារចំនួន ៨១ លើក ទៅលើទីតាំងរបស់ក្រុមហ៊ូទី ដោយអះអាងថាបានសម្លាប់ ឬបន្សាបអ្នកប្រយុទ្ធ និងមេបញ្ជាការមួយចំនួន។
ជាមួយគ្នានេះ អ្នកនាំពាក្យយោធារបស់ក្រុមហ៊ូទី Yahya Saree បានអះអាងថា ក្រុមនេះបានបើកការវាយប្រហារដោយដ្រូនចំនួន ២ លើគោលដៅនៅខេត្ត Najran ប្រទេសអារ៉ាប៊ីសាអូឌីត រួមមានព្រលានយន្តហោះ Najran និងទីតាំងរបស់ក្រុមហ៊ុន Aramco។ ទោះជាយ៉ាងណា មិនទាន់មានការបញ្ជាក់ពីអារ៉ាប៊ីសាអូឌីតភ្លាមៗអំពីការវាយប្រហារទាំងនេះទេ។
ការប្រយុទ្ធនៅយេម៉ែនបានកើនឡើងយ៉ាងខ្លាំងក្នុងរយៈពេលមួយខែកន្លងមក ដោយមានការវាយប្រហារតាមអាកាស ដ្រូន និងការបាញ់ប្រហារនៅតាមខ្សែត្រៀមជាច្រើន។ ទោះបីជាយ៉ាងនេះក្តី មិនទាន់មានភាគីណាមួយបើកការវាយលុកទ្រង់ទ្រាយធំលើខ្សែត្រៀមដែលជាប់គាំងអស់រយៈពេលជាយូរមកហើយនោះទេ៕
