សហរដ្ឋអាមេរិកបានបញ្ជូនជនជាតិម៉ិកស៊ិកប្រហែល២,២៨៤នាក់ ទៅប្រទេសហ្គាតេម៉ាឡា ក្នុងឆ្នាំនេះ ទោះបីរដ្ឋាភិបាលម៉ិកស៊ិកបានជំទាស់ក៏ដោយ។
ប្រភពពីសារព័ត៌មានAl Jazeera នៅថ្ងៃទី២១ខែសីហា។
ប្រធានាធិបតីហ្គាតេម៉ាឡា Bernardo Arévalo បានបញ្ជាក់ថា ជនជាតិម៉ិកស៊ិកទាំងនោះត្រូវបានដឹកមកតាមយន្តហោះដែលដឹកជនជាតិហ្គាតេម៉ាឡាដែលត្រូវបានបណ្តេញចេញពីអាមេរិក។ អាជ្ញាធរហ្គាតេម៉ាឡាបានសហការជាមួយម៉ិកស៊ិក ដើម្បីបញ្ជូនពួកគេត្រឡប់ទៅប្រទេសម៉ិកស៊ិកវិញក្នុងរយៈពេល ២៤ ម៉ោង។
ការបញ្ជូននេះជាផ្នែកមួយនៃគោលនយោបាយរបស់រដ្ឋបាលប្រធានាធិបតី Donald Trump ដែលកំពុងបង្កើនការបណ្តេញជនអន្តោប្រវេសន៍ទៅកាន់ប្រទេសទី៣ ដែលពួកគេមិនចាំបាច់មានទំនាក់ទំនងជាមួយ។
រដ្ឋាភិបាលអាមេរិកអះអាងថា ការបញ្ជូនទៅប្រទេសទី៣អាចប្រើក្នុងករណីដែលជនអន្តោប្រវេសន៍មិនអាចត្រឡប់ទៅប្រទេសកំណើតបាន។ ប៉ុន្តែករណីម៉ិកស៊ិកមានភាពខុសគ្នា ព្រោះម៉ិកស៊ិកធ្លាប់ទទួលយកពលរដ្ឋរបស់ខ្លួនដែលត្រូវបានបណ្តេញចេញពីអាមេរិកជាបន្តបន្ទាប់៕
