នៅថ្ងៃទី២៤ ខែសីហា ឆ្នាំ២០២៦ មនុស្សយ៉ាងហោចណាស់ ៣០នាក់បានស្លាប់ បន្ទាប់ពីគំនរសំរាមដ៏ធំមួយនៅកន្លែងចាក់សំរាមក្នុងរដ្ឋធានី Conakryប្រទេសហ្គីណេ បានដួលរលំសង្កត់លើផ្ទះប្រជាពលរដ្ឋនៅក្បែរនោះ។
ប្រភពពីសារព័ត៌មានBBC។
អាជ្ញាធរបានឱ្យដឹងថា មនុស្ស២២នាក់ផ្សេងទៀតបានរងរបួស ក្នុងនោះ៦នាក់ស្ថិតក្នុងស្ថានភាពធ្ងន់ធ្ងរ។ ហេតុការណ៍នេះបានកើតឡើងប្រហែលម៉ោង២រំលងអធ្រាត្រ បន្ទាប់ពីមានភ្លៀងធ្លាក់ខ្លាំងពេញមួយយប់។
ក្រុមសង្គ្រោះ រួមទាំងកងទ័ព ត្រូវបានបញ្ជូនទៅកន្លែងកើតហេតុ ដើម្បីស្វែងរកអ្នកនៅរស់ និងអ្នកដែលអាចជាប់នៅក្រោមគំនរសំរាម។ អាជ្ញាធរបារម្ភថា ចំនួនអ្នកស្លាប់អាចកើនឡើងបន្ថែមទៀត។
ប្រជាពលរដ្ឋនៅតំបន់កើតហេតុបានប្រមូលផ្តុំគ្នាមើលការងារជួយសង្គ្រោះ ខណៈគ្រឿងចក្រធុនធ្ងន់ត្រូវបានប្រើ ដើម្បីរុះរើ និងស្វែងរកមនុស្សនៅក្រោមគំនរសំរាម។
សូមបញ្ជាក់ថា៖ នាយករដ្ឋមន្ត្រីហ្គីណេ លោក Mamadou Oury Bah ក៏បានចុះទៅកាន់កន្លែងកើតហេតុ ដើម្បីពិនិត្យស្ថានការណ៍ និងដឹកនាំការស្វែងរកអ្នករងគ្រោះ៕
