មនុស្សយ៉ាងហោចណាស់៣០នាក់បានស្លាប់ និង៦នាក់ទៀតរងរបួស បន្ទាប់ពីគំនរសំរាមដ៏ធំនៅទីលានចាក់សំរាម Dar es Salam ក្នុងរដ្ឋធានីកូណាគ្រីរបស់ប្រទេសហ្គីណេ បានបាក់ស្រុត បន្ទាប់ពីមានភ្លៀងធ្លាក់ខ្លាំងពេញមួយយប់។
ប្រភពពីសារព័ត៌មានAl Jazeera នៅថ្ងៃទី២៤ខែសីហា។
ហេតុការណ៍នេះកើតឡើងប្រហែលម៉ោង២ទៀបភ្លឺថ្ងៃអាទិត្យ ដោយគំនរសំរាមបានរអិលបាក់ស្រុតទៅលើផ្ទះ និងខ្ទមរបស់ប្រជាពលរដ្ឋដែលរស់នៅក្បែរតំបន់នោះ។
ក្រុមជួយសង្គ្រោះបានចុះជីកកកាយគំនរសំរាម ដើម្បីស្វែងរកអ្នកដែលអាចនៅរស់រានមានជីវិត។ អ្នករងរបួសធ្ងន់ចំនួន ៦នាក់ត្រូវបានបញ្ជូនទៅមន្ទីរពេទ្យ ខណៈផ្ទះជាច្រើនខ្នងត្រូវបានបំផ្លាញ។
អាជ្ញាធរបាននិយាយថា ទីលានចាក់សំរាមនេះគ្រោងនឹងបិទនៅថ្ងៃកើតហេតុ ហើយប្រជាពលរដ្ឋដែលរស់នៅក្បែរនោះក៏ធ្លាប់ទទួលការជូនដំណឹងឱ្យចាកចេញផងដែរ។ ទោះជាយ៉ាងណា គ្រួសារជាច្រើននៅតែរស់នៅក្នុងតំបន់នោះនៅពេលគ្រោះថ្នាក់កើតឡើង។
អាជ្ញាធរបានប្តេជ្ញាថា នឹងជួយផ្លាស់ទីគ្រួសារដែលនៅសេសសល់ទៅកាន់កន្លែងមានសុវត្ថិភាព៕
