រោងចក្រចម្រាញ់ប្រេងនៅអាមេរិកកំពុងធ្វើការខ្លាំងជាងធម្មតា ដើម្បីផលិតប្រេងសាំង ម៉ាស៊ូត និងប្រេងយន្តហោះឱ្យបានច្រើន ព្រោះប្រទេសជាច្រើនកំពុងខ្វះប្រេងឥន្ធនៈដោយសារសង្គ្រាមនៅអ៊ីរ៉ង់ និងការវាយប្រហារលើរោងចក្រប្រេងរបស់រុស្ស៊ី។
ប្រភពពីសារព័ត៌មានReuter នៅថ្ងៃទី២៥ខែសីហា។
បញ្ហាគឺ រោងចក្រអាមេរិកមិនអាចដំណើរការខ្លាំងបែបនេះបានជារៀងរហូតទេ។ បច្ចុប្បន្ន រោងចក្រមួយចំនួនកំពុងដំណើរការជាង ៩៥% នៃសមត្ថភាពរបស់ខ្លួនជាប់ៗគ្នាអស់រយៈពេលជាង ១១សប្តាហ៍ ដែលជារយៈពេលយូរបំផុតក្នុងជាង ២៥ឆ្នាំ។
ការផលិតច្រើនបែបនេះធ្វើឱ្យក្រុមហ៊ុនចម្រាញ់ប្រេងអាមេរិករកប្រាក់ចំណេញបានច្រើន ប៉ុន្តែវាក៏មានហានិភ័យដែរ។ ប្រសិនបើម៉ាស៊ីន ឬរោងចក្រធំៗខូច ដោយសារប្រើប្រាស់ខ្លាំងពេក ការផ្គត់ផ្គង់ប្រេងឥន្ធនៈពិភពលោកអាចធ្លាក់ចុះភ្លាមៗ។
មូលហេតុមួយទៀតគឺ សង្គ្រាមបានរំខានដល់ការផ្គត់ផ្គង់ប្រេងនៅតំបន់មជ្ឈិមបូព៌ា ខណៈការវាយប្រហាររបស់អ៊ុយក្រែនលើរោងចក្រប្រេងរុស្ស៊ីក៏ធ្វើឱ្យការផលិតប្រេងឥន្ធនៈថយចុះផងដែរ។ ដូច្នេះ ពិភពលោកកំពុងពឹងផ្អែកកាន់តែខ្លាំងលើរោងចក្រអាមេរិក៕
