មនុស្សយ៉ាងហោចណាស់២៧នាក់ ត្រូវបានសម្លាប់ក្នុងការវាយប្រហារចំនួនពីរកន្លែងនៅរដ្ឋSouth Kordofan របស់ប្រទេសស៊ូដង់។
ប្រភពពីសារព័ត៌មានAnadolu Agency នៅថកងៃទី២៦ខែសីហា។
ក្រុមវេជ្ជបណ្ឌិតបានចោទប្រកាន់ក្រុម Sudan People’s Liberation Movement-North (SPLM-N) ដែលជាសម្ព័ន្ធមិត្តរបស់កងកម្លាំង Rapid Support Forces (RSF) ថាជាអ្នកនៅពីក្រោយការវាយប្រហារ។ ការវាយប្រហារបានបង្កឱ្យមានការផ្លាស់ទីលំនៅរបស់ប្រជាពលរដ្ឋជាច្រើនទៅកាន់តំបន់ Abu Hitan និងទីក្រុង Kadugli។
បណ្តាញវេជ្ជបណ្ឌិតបានព្រមានថា ការវាយប្រហារលើជនស៊ីវិលដោយផ្អែកលើជាតិសាសន៍ គឺជាការរំលោភច្បាប់មនុស្សធម៌អន្តរជាតិ និងអាចធ្វើឱ្យជម្លោះនៅ South Kordofan ក្លាយជាជម្លោះជាតិសាសន៍កាន់តែធ្ងន់ធ្ងរ។ ក្រុមនេះបានអំពាវនាវឱ្យសហគមន៍អន្តរជាតិ និងអង្គការសិទ្ធិមនុស្សដាក់សម្ពាធឱ្យ SPLM-N បញ្ឈប់ការវាយប្រហារ និងអនុញ្ញាតឱ្យជំនួយមនុស្សធម៌ចូលដល់អ្នករងគ្រោះ។
សូមបញ្ជាក់ថា៖ ជម្លោះនៅតំបន់ South Kordofan និងរដ្ឋ Kordofan ផ្សេងទៀតបានកើនឡើងចាប់ពីខែតុលាឆ្នាំមុន ដោយកងទ័ពស៊ូដង់ប្រយុទ្ធជាមួយ RSF និង SPLM-N។ សង្គ្រាមនៅស៊ូដង់ដែលបានផ្ទុះឡើងតាំងពីខែមេសា ឆ្នាំ២០២៣ បានបណ្តាលឱ្យមនុស្សរាប់ម៉ឺននាក់ស្លាប់ និងប្រមាណ ១៣ លាននាក់ត្រូវបានបង្ខំឱ្យភៀសខ្លួន ឬផ្លាស់ទីលំនៅ៕
