កងកម្លាំងរក្សាសន្តិភាពរបស់អង្គការសហប្រជាជាតិប្រចាំប្រទេសលីបង់ (UNIFIL) បានឱ្យដឹងថា ស្ថានការណ៍នៅភាគខាងត្បូងលីបង់នៅតែមានភាពផុយស្រួយ ខណៈការប្រយុទ្ធ និងការវាយប្រហារនៅតែបន្តកើតមាន។
ប្រភពពីសារព័ត៌មានAnadolu Agency នៅថ្ងៃទី២៩ខែសីហា។
ចន្លោះពីថ្ងៃទី ២១ ដល់ ២៧ ខែសីហា UNIFIL បានកត់ត្រាគន្លងនៃគ្រាប់ផ្លោងចំនួន ១,០៣០ គ្រាប់ ឬជាមធ្យមប្រហែល ១៤៧ គ្រាប់ក្នុងមួយថ្ងៃ ដែលត្រូវបានបាញ់នៅតំបន់ភាគខាងត្បូងលីបង់។
UNIFIL បានបញ្ជាក់ថា ទោះបីកម្រិតអំពើហិង្សាបានថយចុះបើប្រៀបធៀបនឹងដើមឆ្នាំក៏ដោយ ស្ថានការណ៍នៅតែបង្កការលំបាកយ៉ាងខ្លាំងដល់ប្រជាជនស៊ីវិល។ ផ្ទះសម្បែង និងហេដ្ឋារចនាសម្ព័ន្ធសំខាន់ៗជាច្រើនបានរងការខូចខាត ខណៈសហគមន៍ក្នុងតំបន់កំពុងព្យាយាមស្តារជីវភាពឡើងវិញ។
នៅថ្ងៃសុក្រ កងទ័ពអ៊ីស្រាអែលបានបង្កើនការវាយប្រហារនៅតំបន់នេះ ដោយមានការវាយកម្ទេចអគារនៅទីក្រុងចំនួន៣ ការបាញ់កាំភ្លើងធំ និងការចូលទៅកាន់តំបន់ Aita al-Jabal។ អាជ្ញាធរលីបង់បានរាយការណ៍ថា ក្នុងរយៈពេល២ថ្ងៃចុងក្រោយ មានមនុស្ស ២នាក់ស្លាប់ និង៨នាក់រងរបួស។
ក្រសួងសុខាភិបាលលីបង់បានឱ្យដឹងថា ចាប់តាំងពីថ្ងៃទី ២ ខែមីនា មកការវាយប្រហាររបស់អ៊ីស្រាអែលនៅភាគខាងត្បូងលីបង់បានបណ្តាលឱ្យមនុស្ស ៤,៣៥២ នាក់ស្លាប់ និង ១២,៣១៨ នាក់រងរបួស។
UNIFIL បានអំពាវនាវឱ្យគ្រប់ភាគីគោរព សេចក្តីសម្រេចលេខ ១៧០១ របស់ក្រុមប្រឹក្សាសន្តិសុខអង្គការសហប្រជាជាតិ ដើម្បីកាត់បន្ថយភាពតានតឹង បញ្ឈប់ការកើនឡើងនៃអំពើហិង្សា និងជួយឱ្យប្រជាជននៅតំបន់រងគ្រោះអាចស្តារជីវភាពឡើងវិញ៕
