ប្រធានាធិបតីសហរដ្ឋអាមេរិក លោកដូណាល់ ត្រាំ បានបញ្ជាក់ជាថ្មីថា អ៊ីរ៉ង់មិនត្រូវបានអនុញ្ញាតឱ្យទទួលបានអាវុធនុយក្លេអ៊ែរឡើយ ដោយអះអាងថា ប្រសិនបើទីក្រុងតេហេរ៉ង់មានអាវុធប្រភេទនេះ វាអាចប្រើប្រឆាំងនឹងអ៊ីស្រាអែល ហើយអាចពង្រីកការគំរាមកំហែងទៅដល់សហរដ្ឋអាមេរិកនិងអឺរ៉ុប។
ប្រភពពីសារព័ត៌មានAnadolu Agency នៅថ្ងៃទី៣១ខែសីហា។
ក្នុងបទសម្ភាសន៍ជាមួយ Fox News ដែលចេញផ្សាយកាលពីថ្ងៃអាទិត្យ លោក ត្រាំ បាននិយាយថា អ៊ីរ៉ង់នឹងមិនមានអាវុធនុយក្លេអ៊ែរឡើយ ហើយបានចោទប្រកាន់មេដឹកនាំអ៊ីរ៉ង់ថា ជាមនុស្សមានអំពើហិង្សា និងអាក្រក់។
លោកក៏បានអះអាងថា សហរដ្ឋអាមេរិកកំពុងដាក់សម្ពាធ និងវាយប្រហារអ៊ីរ៉ង់យ៉ាងខ្លាំង ព្រមទាំងសរសើរអ្វីដែលលោកហៅថា ការបិទខ្ទប់អ៊ីរ៉ង់ ដែលលោកជឿថាកំពុងបង្កការខូចខាតយ៉ាងធ្ងន់ធ្ងរ។
លោក ត្រាំ បានបន្ថែមថា លោកភ្ញាក់ផ្អើលនៅពេលអ៊ីរ៉ង់ចាប់ផ្តើមវាយប្រហារប្រទេសនៅតំបន់ឈូងសមុទ្រ ហើយជឿថា សកម្មភាពទាំងនេះបានធ្វើឱ្យអ៊ីរ៉ង់បាត់បង់ការគាំទ្រ។ លោកក៏អះអាងថា សហរដ្ឋអាមេរិកកំពុងឈ្នះសង្គ្រាមប្រឆាំងអ៊ីរ៉ង់ និងវេណេស៊ុយអេឡាយ៉ាងងាយស្រួល៕
