មន្ទីរបញ្ចកោណអាមេរិកបានចេញបទបញ្ជាថ្មី ដែលចាប់ផ្តើមអនុវត្តភ្លាមៗ ដើម្បីពិនិត្យបញ្ហាអ័រម៉ូនក្នុងចំណោមកងទ័ព។
ប្រភពពីសារព័ត៌មានReuter នៅថ្ងៃទី៣ខែកញ្ញា។
តាមគោលការណ៍ថ្មី ទាហានបុរសដែលមានអាយុ ៣០ ឆ្នាំឡើងទៅត្រូវធ្វើតេស្តឈាម ដើម្បីពិនិត្យកម្រិតតេស្តូស្តេរ៉ូន។ ចំណែកបុរសដែលមានអាយុក្រោម ៣០ ឆ្នាំ មិនចាំបាច់ធ្វើតេស្តជាប្រចាំទេ លុះត្រាតែពួកគេស្នើសុំ ឬគ្រូពេទ្យសង្ស័យថាមានបញ្ហា។
សម្រាប់ ទាហានស្ត្រី មន្ទីរបញ្ចកោណមិនតម្រូវឱ្យធ្វើតេស្តតេស្តូស្តេរ៉ូនជាប្រចាំទេ។ ប៉ុន្តែគ្រូពេទ្យនឹងពិនិត្យរោគសញ្ញាដូចជា អស់កម្លាំងខ្លាំង ឬរដូវមិនទៀងទាត់ ដែលអាចជាសញ្ញាបង្ហាញថារាងកាយមានបញ្ហាអ័រម៉ូន ឬទទួលបានថាមពលមិនគ្រប់គ្រាន់។
គោលបំណងរបស់ក្រសួងការពារជាតិអាមេរិក គឺចង់ រកឃើញបញ្ហាសុខភាពរបស់ទាហានឱ្យបានឆាប់ និងព្យាបាលឱ្យបានត្រឹមត្រូវ ដើម្បីរក្សាសមត្ថភាព និងភាពរួចរាល់របស់កងទ័ព។
ទោះជាយ៉ាងណា គោលនយោបាយនេះកំពុងមានការជជែកវែកញែកពីអ្នកជំនាញវេជ្ជសាស្ត្រ ព្រោះពួកគេចង់ដឹងថា តើការធ្វើតេស្តតេស្តូស្តេរ៉ូនជាកាតព្វកិច្ចសម្រាប់ទាហានទាំងអស់ពិតជាមានមូលដ្ឋានវិទ្យាសាស្ត្រគ្រប់គ្រាន់ឬយ៉ាងណា៕
