កម្មវិធីស្បៀងអាហារពិភពលោក(WFP) របស់អង្គការសហប្រជាជាតិ បាននិយាយថាការវាយប្រហារតាមអាកាសមួយបានបំផ្លាញរថយន្តដឹកជំនួយអាហារ២គ្រឿង នៅជិតទីក្រុង Dilling ក្នុងរដ្ឋ South Kordofan របស់ប្រទេសស៊ូដង់។
ប្រភពពីសារព័ត៌មានAnadolu Agency នៅថ្ងៃទី៣ខែកញ្ញា។
រថយន្តទាំងពីរគ្រឿងកំពុងដឹកអាហារជាង៥០តោនទៅកាន់ទីក្រុង Kadugli ដើម្បីផ្តល់អាហារដល់មនុស្សប្រហែល ៥,៨០០នាក់ អស់រយៈពេលមួយខែ។ អាហារដែលត្រូវបានបំផ្លាញរួមមានធញ្ញជាតិ សណ្តែក ប្រេងបន្លែ និងអំបិល។
WFP បានថ្កោលទោសការវាយប្រហារនេះ ដោយបញ្ជាក់ថា រថយន្តទាំងពីរត្រូវបានសម្គាល់យ៉ាងច្បាស់ថាជារថយន្តរបស់ WFP។ ទោះជាយ៉ាងណា WFP មិនបានបញ្ជាក់ថា ភាគីណាជាអ្នកវាយប្រហារនោះទេ។
អង្គការសហប្រជាជាតិបានអំពាវនាវឱ្យគ្រប់ភាគីក្នុងសង្គ្រាមគោរពច្បាប់មនុស្សធម៌អន្តរជាតិ និងការពារជនស៊ីវិល បុគ្គលិកជំនួយ និងសម្ភារៈមនុស្សធម៌។
សូមបញ្ជាក់ថា៖ ស៊ូដង់កំពុងជាប់ក្នុងសង្គ្រាមរវាង កងទ័ពស៊ូដង់ និងក្រុម RSF ចាប់តាំងពីខែមេសា ឆ្នាំ២០២៣។ សង្គ្រាមនេះបានសម្លាប់មនុស្សរាប់ម៉ឺននាក់ និងធ្វើឱ្យប្រជាជនប្រមាណ ១៣លាននាក់ត្រូវភៀសខ្លួន៕
