ប្រធានាធិបតីអ៊ុយក្រែន លោកVolodymyr Zelenskyy ចោទប្រកាន់រុស្ស៊ីថា បានបើកការវាយប្រហារដោយប្រើមីស៊ីល និងដ្រូនទៅលើព្រលានយន្តហោះនៅកៀវនិងBoryspil កាលពីយប់មិញ ដើម្បីបង្ហាញសារមួយ មុនពេលមន្ត្រីពិសេសអាមេរិក Steve Witkoff និង Jared Kushner គ្រោងទៅទស្សនាអ៊ុយក្រែន។
ប្រភពពីសារព័ត៌មានAnadolu Agency កាលពីថ្ងៃទី៥ខែកញ្ញា។
លោក Zelenskyy បាននិយាយថា ការវាយប្រហារនេះអាចពាក់ព័ន្ធនឹងផែនការរបស់មន្ត្រីអាមេរិកក្នុងការធ្វើដំណើរតាមយន្តហោះ និងចុះចតនៅព្រលានយន្តហោះកៀវ ឬ Boryspil។
លោកបានចោទថា រុស្ស៊ីបានកំណត់គោលដៅលើព្រលានយន្តហោះទាំងនេះដោយចេតនា ដើម្បីបង្ហាញការប្រឆាំងចំពោះកិច្ចខិតខំប្រឹងប្រែងការទូតរបស់អាមេរិក។
លោក Zelenskyy ក៏បានបញ្ជាក់ថា អ៊ុយក្រែននៅតែចង់ជំរុញការចរចា និងស្វែងរកសន្តិភាព ប៉ុន្តែរុស្ស៊ីនឹងត្រូវទទួលខុសត្រូវចំពោះសកម្មភាពរបស់ខ្លួន។
សូមបញ្ជាក់ថា៖ តាមការរាយការណ៍របស់ Axios និងសារព័ត៌មានរដ្ឋរុស្ស៊ី TASS លោក Witkoff និងលោក Kushner គ្រោងធ្វើដំណើរទៅ ទីក្រុងមូស្គូ និងកៀវ នៅចុងសប្តាហ៍នេះ។ លោក Zelenskyy បាននិយាយថា ពួកគេនឹងមកដល់កៀវនៅថ្ងៃអាទិត្យ បន្ទាប់ពីបញ្ចប់ដំណើរទៅមូស្គូ៕
