យ៉ាងហោចណាស់មនុស្ស១០នាក់បានស្លាប់ និង៦៤នាក់ទៀតរងរបួស បន្ទាប់ពីសារធាតុសម្រាប់បាញ់កាំជ្រួចបានផ្ទុះក្នុងពិធីបុណ្យសាសនាមួយនៅក្រុង Temascalcingo រដ្ឋម៉ិកស៊ិក កាលពីយប់ថ្ងៃសៅរ៍។
ប្រភពពីសារព័ត៌មានAP នៅថ្ងៃទី៧ខែកញ្ញា។
ហេតុការណ៍បានកើតឡើងនៅក្បែរវិហារ Nuestra Señora de la Luz ខណៈប្រជាពលរដ្ឋរាប់រយនាក់កំពុងរង់ចាំទស្សនាការបាញ់កាំជ្រួចក្នុងពិធីបុណ្យគោរពបូជាព្រះនាងនៃពន្លឺ។ កម្លាំងផ្ទុះបានបណ្តាលឱ្យជញ្ជាំងមួយដួលរលំ និងបង្កការខូចខាតនៅតំបន់កើតហេតុ។
វីដេអូដែលបង្ហោះលើបណ្តាញសង្គមបង្ហាញពីផ្សែង និងកម្ទេចកម្ទី ខណៈប្រជាជនកំពុងស្វែងរកអ្នករងគ្រោះ។
មូលហេតុពិតប្រាកដនៃការផ្ទុះមិនទាន់ត្រូវបានបញ្ជាក់នៅឡើយទេ ហើយការិយាល័យអយ្យការរដ្ឋម៉ិកស៊ិកបានបើកការស៊ើបអង្កេត។ ករណីផ្ទុះពាក់ព័ន្ធនឹងកាំជ្រួចកើតមានជាញឹកញាប់នៅម៉ិកស៊ិក ដោយសារកាំជ្រួចត្រូវបានប្រើប្រាស់យ៉ាងទូលំទូលាយក្នុងពិធីបុណ្យតាមដងផ្លូវ និងពិធីសាសនា៕
