អង្គការសហប្រជាជាតិបានអំពាវនាវឱ្យសហគមន៍អន្តរជាតិបង្កើនជំនួយដល់ប្រជាជនរងគ្រោះពីទឹកជំនន់ដ៏ធ្ងន់ធ្ងរនៅតំបន់ហិម៉ាឡ័យ ដែលបានវាយប្រហារនេប៉ាល់និងតំបន់ទីបេរបស់ចិនកាលពីថ្ងៃទី២៦ខែសីហា។
ប្រភពពីសារព័ត៌មានAl Jazeera នៅថ្ងៃទី៧ខែកញ្ញា។
តាមអាជ្ញាធរ និងអង្គការអន្តរជាតិ មនុស្សយ៉ាងហោចណាស់ ១,៣៨៤នាក់បានស្លាប់ និងជាង ៥,៥០០នាក់ទៀតបាត់ខ្លួន នៅនេប៉ាល់ និងទីបេ។ ក្នុងចំណោមអ្នកបាត់ខ្លួន មានជនបរទេសជាង ៨០០នាក់ មកពីយ៉ាងហោចណាស់ ៣៤ប្រទេស។
ទឹកជំនន់បានបំផ្លាញផ្លូវ ស្ពាន និងហេដ្ឋារចនាសម្ព័ន្ធវារីអគ្គិសនីជាច្រើន ធ្វើឱ្យសហគមន៍មួយចំនួននៅតំបន់ភ្នំដាច់ចេញពីពិភពខាងក្រៅ។ ប្រជាជនជាច្រើនបានបាត់បង់ផ្ទះសម្បែង ជីវភាព និងសមាជិកគ្រួសារ។
អង្គការសហប្រជាជាតិបានដាក់ចេញការអំពាវនាវរកថវិកា ៥០លានដុល្លារ ដើម្បីជួយប្រជាជនជាង ៨៤,០០០នាក់ ដែលរងផលប៉ះពាល់។ អង្គការនេះក៏ព្រមានពីហានិភ័យនៃជំងឺអាសន្នរោគ និងជំងឺឆ្លងផ្សេងៗ ដោយសារបញ្ហាទឹកស្អាត អនាម័យ និងបរិស្ថាន។
មន្ត្រីអង្គការសហប្រជាជាតិបានអំពាវនាវឱ្យសហគមន៍អន្តរជាតិផ្តល់ជំនួយជាបន្ទាន់ ដើម្បីឱ្យប្រជាជននេប៉ាល់ និងអ្នករងគ្រោះផ្សេងទៀតអាចចាប់ផ្តើមស្តារជីវិតឡើងវិញ៕
