អាជ្ញាធរឥណ្ឌូណេស៊ីបានបន្តបិទអាកាសយានដ្ឋានចំនួន៤រួមទាំងអាកាសយានដ្ឋានអន្តរជាតិ Soekarno-Hatta នៅទីក្រុងហ្សាការតា រហូតដល់ម៉ោង៦ល្ងាចថ្ងៃចន្ទ ដោយសារផេះភ្នំភ្លើង Anak Krakatau បង្កការរំខានដល់ការហោះហើរ។
ប្រភពពីសារព័ត៌មានTRT World នភថ្ងៃទី៧ខែសីហា។
ភ្នំភ្លើងAnak Krakatau ដែលស្ថិតនៅចម្ងាយប្រមាណ ១៥០គីឡូម៉ែត្រពីហ្សាការតា បានផ្ទុះកាលពីថ្ងៃសៅរ៍ និងបញ្ចេញផេះភ្នំភ្លើងឡើងលើអាកាស។ ការផ្ទុះនេះបានធ្វើឱ្យជើងហោះហើរជាង១,០០០ត្រូវបានរំខាន និងធ្វើឱ្យអ្នកដំណើរជាង ១៧០,០០០នាក់ជាប់គាំង។
នៅព្រឹកថ្ងៃចន្ទ អាកាសយានដ្ឋាន Soekarno-Hatta មានអ្នកដំណើរច្រើនកុះករ ខណៈមនុស្សជាច្រើនកំពុងរង់ចាំស្នើសុំបង្វិលប្រាក់ ឬប្តូរថ្ងៃហោះហើរ។ ជើងហោះហើរជាច្រើនត្រូវបានពន្យារទៅថ្ងៃអង្គារ ដើម្បីសុវត្ថិភាពអ្នកដំណើរ និងបុគ្គលិកអាកាសចរណ៍៕
