(ពោធិ៍សាត់)៖ នៅថ្ងៃទី៨ ខែកញ្ញា ឆ្នាំ២០២៦ កម្មករ កម្មការិនីនៃរោងចក្រកាត់ដេរ «លានហ្វាហេងយូ» ស្ថិតក្នុងឃុំស្នាមព្រះ ស្រុកបាកាន ខេត្តពោធិ៍សាត់ បានប្រមូលផ្តុំគ្នាតវ៉ា និងបិទផ្លូវជាតិលេខ៥ បង្កឱ្យមានការកកស្ទះចរាចរណ៍យ៉ាងខ្លាំង។
ចំពោះការធ្វើបាតុកម្មនេះ គឺកើតឡើងដោយសារក្រុមកម្មករមិនពេញចិត្តចំពោះលោក ផុង សុខា តំណាងរដ្ឋបាលរោងចក្រ ដែលបានប្រើប្រាស់ពាក្យសម្តីអសុរោះ ជេរប្រមាថ និងបង្ហាញកាយវិការមិនសមរម្យ ធាក់តុម៉ាស៊ីន លើពួកគេ ដោយកម្មករមិនសុខចិត្តបានទាមទារដាច់ខាតឱ្យបញ្ឈប់បុគ្គលិករូបនេះចេញពីតំណែង។
ដើម្បីដោះស្រាយសភាពការណ៍ចំពោះមុខ តំណាងរដ្ឋបាលខេត្តពោធិ៍សាត់ ដឹកនាំដោយលោកអភិបាលរងខេត្ត នាយករដ្ឋបាលសាលាខេត្ត ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត អាជ្ញាធរស្រុកបាកាន ព្រមទាំងកងកម្លាំងប្រដាប់អាវុធ បានចុះអន្តរាគមន៍ និងសម្របសម្រួលដោយផ្ទាល់។
ជាលទ្ធផលនៃការសម្របសម្រួល លោក ផុង សុខា បានស្ម័គ្រចិត្តដាក់ពាក្យសុំលាលែងពីការងារភ្លាមៗ នៅថ្ងៃទី៨ ខែកញ្ញា ឆ្នាំ២០២៦ តាមសំណូមពររបស់កម្មករផងដែរ។
ដំណោះស្រាយតាមច្បាប់ អាជ្ញាធរបានទទួលយកសំណូមពរផ្សេងៗទៀត ដើម្បីបន្តដោះស្រាយដោយឈរលើគោលការណ៍ «ឈ្នះ-ឈ្នះ» តម្លាភាព និងយុត្តិធម៌ ស្របតាមច្បាប់ស្តីពីការងារ ដើម្បីការពារប្រាក់ចំណូលកម្មករ និងនិរន្តរភាពរបស់រោងចក្រ។
ក្រោយទទួលបានដំណោះស្រាយនេះ ក្រុមកម្មករបានយល់ព្រមរំសាយការតវ៉ា ហើយកងកម្លាំងសមត្ថកិច្ចបានសម្រួលចរាចរណ៍នៅលើកំណាត់ផ្លូវជាតិលេខ៥ ឱ្យដំណើរការឡើងវិញជាប្រក្រតី និងមានសុវត្ថិភាពទាំងស្រុង៕
