អតីតមេដឹកនាំហុងកុង លោក Tung Chee-hwa ដែលជាមេដឹកនាំដំបូងរបស់ហុងកុង បន្ទាប់ពីអង់គ្លេសប្រគល់ហុងកុងឱ្យចិន គ្រប់គ្រងវិញ បានទទួលមរណភាពក្នុងវ័យ ៨៩ឆ្នាំ។
ប្រភពពីសារព័ត៌មានReuter នៅថ្ងៃទី៩ខែកញ្ញា។
លោក Tung បានកាន់តំណែងជាមេដឹកនាំហុងកុង ចាប់ពីឆ្នាំ១៩៩៧ បន្ទាប់ពីហុងកុងត្រូវបានប្រគល់ពីអង់គ្លេសមកឱ្យចិន។ ក្នុងសុន្ទរកថាដំបូងរបស់លោក លោកបានសន្យាថា រដ្ឋាភិបាលហុងកុងនឹងរក្សារបៀបរស់នៅរបស់ប្រជាជន ប្រព័ន្ធសេដ្ឋកិច្ចសេរី និងបើកចំហ ព្រមទាំងគោរពនីតិរដ្ឋ និងជំរុញការអភិវឌ្ឍប្រជាធិបតេយ្យ។
ប៉ុន្តែភាពតានតឹងបានកើនឡើងនៅឆ្នាំ២០០៣ នៅពេលលោក Tung ព្យាយាមជំរុញការអនុម័ត មាត្រា២៣ ដែលជាច្បាប់សន្តិសុខជាតិ សម្រាប់ដាក់ទោសលើបទល្មើសដូចជា ក្បត់ជាតិ និងញុះញង់ ព្រមទាំងផ្តល់អំណាចបន្ថែមដល់ប៉ូលិស។
សំណើច្បាប់នេះបានបង្កឱ្យមានការតវ៉ាដ៏ធំមួយ ដែលមានប្រជាជនប្រហែលកន្លះលាននាក់ចូលរួម ដោយពួកគេបារម្ភថា ច្បាប់នេះអាចប៉ះពាល់ដល់សេរីភាពរបស់ប្រជាជនហុងកុង។ ដោយសារសម្ពាធពីការតវ៉ា លោក Tung បានដកថយពីការជំរុញច្បាប់នេះ។
សូមបញ្ជាក់ថា៖ ព្រឹត្តិការណ៍ឆ្នាំ២០០៣ បានក្លាយជាចំណុចសំខាន់មួយ ដែលបង្កើនភាពតានតឹងរវាងក្រុមប្រជាធិបតេយ្យនៅហុងកុង និងរដ្ឋាភិបាលកណ្តាលចិន។ ភាពតានតឹងនេះបានបន្តកើនឡើង និងឈានដល់ការតវ៉ាធំៗនៅឆ្នាំ២០១៤ និង២០១៩៕
