អ៊ីរ៉ង់ និងសហរដ្ឋអាមេរិកបានបង្កើនការវាយប្រហារទៅលើនាវានៅជុំវិញច្រកសមុទ្រ Hormuz ក្នុងរយៈពេលប៉ុន្មានថ្ងៃចុងក្រោយ ដែលជាការប្រឈមមុខគ្នាដ៏ធំបំផុតលើវិស័យដឹកជញ្ជូនតាមសមុទ្រ ចាប់តាំងពីសង្គ្រាមរវាងប្រទេសទាំងពីរបានចាប់ផ្តើម។
ប្រភពពីសារព័ត៌មានReuter នៅថ្ងៃទី៩ខែកញ្ញា។
អ៊ីរ៉ង់បានអះអាងថា កងកម្លាំងឆ្មាំបដិវត្តន៍របស់ខ្លួនបានវាយប្រហារនាវាចំនួន១០គ្រឿង ក្នុងនោះមាននាវាអាមេរិក២គ្រឿង និងនាវាដឹកប្រេង ៨ គ្រឿង។ ចំណែកសហរដ្ឋអាមេរិកវិញ បាននិយាយថា ខ្លួនបានវាយប្រហារ និងបំផ្លាញនាវាដឹកប្រេងរបស់អ៊ីរ៉ង់ចំនួន ៥ គ្រឿង បន្ទាប់ពីអ៊ីរ៉ង់បានវាយប្រហារនាវាចម្បាំងអាមេរិកដោយមីស៊ីលបាលីស្ទិក។
ការប្រយុទ្ធនៅតំបន់ច្រកសមុទ្រ Hormuz បានធ្វើឱ្យទីផ្សារថាមពលពិភពលោកមានការព្រួយបារម្ភយ៉ាងខ្លាំង។ តម្លៃប្រេងឆៅ Brent បានកើនឡើងលើស ១០០ ដុល្លារក្នុងមួយបារ៉ែល ខណៈតម្លៃប្រេងម៉ាស៊ូតនៅសហរដ្ឋអាមេរិកក៏ឡើងដល់កម្រិតខ្ពស់បំផុតថ្មី។
ក្រៅពីការវាយប្រហារលើនាវា អ៊ីរ៉ង់ក៏បានបាញ់មីស៊ីលទៅកាន់មូលដ្ឋានមួយនៅប្រទេសហ្ស៊កដានី ដែលមានកងកម្លាំងអាមេរិកប្រើប្រាស់។ ហ្ស៊កដានីបានអះអាងថា ខ្លួនអាចស្ទាក់ចាប់មីស៊ីលភាគច្រើនបាន។
អ៊ីរ៉ង់បានព្រមានថា ខ្លួននឹងបង្កើនការឆ្លើយតបយ៉ាងខ្លាំង ប្រសិនបើសហរដ្ឋអាមេរិកបន្តវាយប្រហារ។ ស្ថានការណ៍នេះកំពុងបង្កើនការព្រួយបារម្ភថា ការប្រយុទ្ធអាចរំខានដល់ការដឹកជញ្ជូនប្រេងតាមច្រកសមុទ្រ Hormuz និងធ្វើឱ្យតម្លៃប្រេងនៅលើពិភពលោកកាន់តែឡើងខ្ពស់៕
