កងកម្លាំងរុស្ស៊ីបានបើកការវាយប្រហារតាមតំបន់ជាច្រើនក្នុងប្រទេសអ៊ុយក្រែន បណ្តាលឱ្យមនុស្សយ៉ាងហោចណាស់៧នាក់ស្លាប់ និងជាង៣០នាក់ទៀតរងរបួស ខណៈអ៊ុយក្រែនបានអះអាងថា ខ្លួនបានបើកការវាយប្រហារដោយយន្តហោះដ្រូនទៅលើរោងចក្រឧស្ម័នធម្មជាតិមួយនៅតំបន់អាក់ទិករបស់រុស្ស៊ី។
ប្រភពពីសារព័ត៌មានAl Jazeera នៅថ្ងៃទី១០ខែកញ្ញា។
នៅទីក្រុង Mykolaiv ភាគខាងត្បូងអ៊ុយក្រែន មនុស្ស ៤នាក់បានស្លាប់ និងយ៉ាងហោចណាស់ ១៩នាក់រងរបួស បន្ទាប់ពីការវាយប្រហាររបស់រុស្ស៊ីបានប៉ះទាំងហេដ្ឋារចនាសម្ព័ន្ធស៊ីវិល និងឧស្សាហកម្ម។
នៅទីក្រុង Sumy ភាគឦសាន ការវាយប្រហារដោយដ្រូនទៅលើមជ្ឈមណ្ឌលពាណិជ្ជកម្មបានសម្លាប់មនុស្ស ៣នាក់ និងធ្វើឱ្យយ៉ាងហោចណាស់ ១៤នាក់រងរបួស ក្នុងនោះមានកុមារ ៣នាក់។
ជាមួយគ្នានេះ អាជ្ញាធររុស្ស៊ីបាននិយាយថា អ៊ុយក្រែនបានវាយប្រហារតំបន់ Yamal-Nenets ដែលស្ថិតនៅចម្ងាយប្រមាណ ២,៨០០គីឡូម៉ែត្រពីព្រំដែនអ៊ុយក្រែន។ ការវាយប្រហារបានកំណត់គោលដៅលើរោងចក្រឧស្សាហកម្មនៅក្រុង Novy Urengoy ហើយកម្ទេចកម្ទីពីដ្រូនបានបង្កឱ្យមានអគ្គិភ័យ។
សូមបញ្ជាក់ថា៖ ការវាយប្រហារទាំងនេះបង្ហាញពីការកើនឡើងនៃសកម្មភាពវាយប្រហាររវាងភាគីទាំងពីរ ខណៈសង្គ្រាមរុស្ស៊ី-អ៊ុយក្រែននៅតែបន្តមានភាពតានតឹងខ្លាំង៕
