អ៊ីស្រាអែលនិងលីបង់ ត្រូវបានរំពឹងថា នឹងបើកកិច្ចចរចាជុំថ្មី នៅទីក្រុងរ៉ូមរបស់ប្រទេសអ៊ីតាលី នៅសប្តាហ៍ក្រោយ។ កិច្ចប្រជុំនេះ គ្រោងធ្វើនៅថ្ងៃអង្គារ និងថ្ងៃពុធ ដើម្បីពិភាក្សាអំពីការបង្កើតក្រុមមួយសម្រាប់ត្រួតពិនិត្យថា តំបន់ដែលបានកំណត់សាកល្បងត្រូវបានដកកម្លាំងHezbollahចេញឬអត់។
ប្រភពពីសារព័ត៌មានAnadolu Agency នៅថ្ងៃទី១១ខែកញ្ញា។
សហរដ្ឋអាមេរិកកំពុងជំរុញឱ្យអ៊ីស្រាអែល ពង្រីកតំបន់ដែលខ្លួនត្រូវដកកម្លាំងចេញ ហើយប្រគល់ការគ្រប់គ្រងតំបន់ទាំងនោះទៅឱ្យកងទ័ពលីបង់។
ចាប់តាំងពីថ្ងៃទី១៤ ខែមេសា អ៊ីស្រាអែល និងលីបង់បានធ្វើកិច្ចចរចាផ្ទាល់គ្នា ៧ជុំ។ កិច្ចចរចាចំនួន៥ធ្វើនៅអាមេរិក និង២ជុំចុងក្រោយធ្វើនៅរ៉ូម។ ប៉ុន្តែ Hezbollah បានបដិសេធការចរចា និងអំពាវនាវឱ្យរដ្ឋាភិបាលលីបង់បញ្ឈប់ការចរចាជាមួយអ៊ីស្រាអែល។
កិច្ចព្រមព្រៀងក្របខណ្ឌដែលបានចុះហត្ថលេខានៅថ្ងៃទី២៦ ខែមិថុនា កំណត់ឱ្យអ៊ីស្រាអែល ដកកម្លាំងចេញពីទឹកដីលីបង់ដែលខ្លួនកាន់កាប់ជាបន្តបន្ទាប់ ហើយឱ្យកងទ័ពលីបង់ចូលទៅគ្រប់គ្រងតំបន់ទាំងនោះ។
ទោះជាយ៉ាងណា កងទ័ពលីបង់បាននិយាយថា ចាប់តាំងពីកិច្ចព្រមព្រៀងនេះត្រូវបានចុះហត្ថលេខា មាន ការរំលោភបំពានរបស់អ៊ីស្រាអែលប្រមាណ ៧,៧០០ករណី។ លីបង់ព្រមានថា ប្រសិនបើការរំលោភបំពាននៅតែបន្ត វាអាចប៉ះពាល់ដល់កិច្ចព្រមព្រៀង និងការយល់ព្រមដែលមានស្រាប់៕
