អារ៉ាប៊ីសាអូឌីតបានបិទជាបណ្តោះអាសន្ននូវបំពង់បង្ហូរប្រេងEast-West បន្ទាប់ពីបំពង់នេះត្រូវបានវាយប្រហារដោយដ្រូនជាច្រើនគ្រឿង ដែលអាជ្ញាធរអារ៉ាប៊ីសាអូឌីតអះអាងថា បាញ់ចេញពីទឹកដីអ៊ីរ៉ាក់។
ប្រភពពីសារព័ត៌មានAl Jazeera នៅថ្ងៃទី១២ខែកញ្ញា។
ក្រសួងការបរទេសអារ៉ាប៊ីសាអូឌីតបានឱ្យដឹងថា ការវាយប្រហារបានកើតឡើងនៅតំបន់Riyadh និង Medina បណ្តាលឱ្យមនុស្សមួយចំនួនរងរបួស និងបង្កការខូចខាតដល់ហេដ្ឋារចនាសម្ព័ន្ធ។ បំពង់ប្រេងត្រូវបានបិទជាបណ្តោះអាសន្ន ដើម្បីការពារសុវត្ថិភាព។
អារ៉ាប៊ីសាអូឌីតបានថ្កោលទោសយ៉ាងខ្លាំងចំពោះការវាយប្រហារ ប៉ុន្តែបានសម្រេច មិនធ្វើការវាយប្រហារតបតាមភ្លាមៗ តាមសំណើរបស់នាយករដ្ឋមន្ត្រីអ៊ីរ៉ាក់ ដើម្បីទុកឱកាសឱ្យរដ្ឋាភិបាលអ៊ីរ៉ាក់ស៊ើបអង្កេត និងចាត់វិធានការទប់ស្កាត់ការវាយប្រហារពីទឹកដីរបស់ខ្លួន។
អ៊ីរ៉ាក់ក៏បានថ្កោលទោសការវាយប្រហារនេះ និងបញ្ជាក់ថា ខ្លួនមិនទទួលយកសកម្មភាពណាមួយដែលគំរាមកំហែងដល់សន្តិសុខអារ៉ាប៊ីសាអូឌីតឡើយ។
ក្រោយការស៊ើបអង្កេត រដ្ឋាភិបាលអ៊ីរ៉ាក់បានបណ្តេញមេបញ្ជាការយោធាដែលដឹកនាំប្រតិបត្តិការនៅខេត្ត Maysan បន្ទាប់ពីរកឃើញថា ដ្រូនដែលវាយប្រហារអារ៉ាប៊ីសាអូឌីត ត្រូវបានបាញ់បង្ហោះចេញពីទីតាំងមួយក្នុងខេត្តភាគខាងត្បូងនេះ។ រដ្ឋាភិបាលអ៊ីរ៉ាក់ក៏បានបង្កើតក្រុមស៊ើបអង្កេត ដើម្បីស្វែងរកអ្នកនៅពីក្រោយការវាយប្រហារ៕
