រុស្ស៊ីបានបើកការវាយប្រហារតាមអាកាសលើរោងចក្រឧស្សាហកម្មជាច្រើននៅទូទាំងប្រទេសអ៊ុយក្រែន ដោយផ្តោតលើហេដ្ឋារចនាសម្ព័ន្ធផលិតកម្ម និងឧស្សាហកម្មរបស់អ៊ុយក្រែន។
ប្រភពពីសារព័ត៌មានAl Jazeera នៅថ្ងៃទី១២ខែកញ្ញា។
ក្រសួងការពារជាតិរុស្ស៊ីបានអះអាងថា កងកម្លាំងរបស់ខ្លួនបានវាយប្រហាររោងចក្រផលិតដែក Zaporizhstal នៅទីក្រុង Zaporizhzhia រោងចក្រ Interpipe Steel នៅទីក្រុង Dnipro និងរោងចក្រមួយចំនួននៅទីក្រុង Kryvyi Rih។
ក្រុមហ៊ុន ArcelorMittal បាននិយាយថា ការវាយប្រហារលើរោងចក្ររបស់ខ្លួននៅ Kryvyi Rih បានបណ្តាលឱ្យមនុស្សយ៉ាងហោចណាស់២នាក់ស្លាប់ និងធ្វើឱ្យតំបន់ផលិតកម្មមួយចំនួនរងការខូចខាត។
រុស្ស៊ីក៏បាននិយាយថា នាវាដឹកទំនិញ២គ្រឿង ត្រូវបានរងការវាយប្រហារនៅកំពង់ផែ Chornomorsk ក្នុងសមុទ្រខ្មៅ។
ការវាយប្រហាររបស់រុស្ស៊ីកើតឡើងបន្ទាប់ពីអ៊ុយក្រែនបានប្រើយន្តហោះដ្រូនវាយប្រហារទីតាំងឧស្សាហកម្មនៅតំបន់ Samara របស់រុស្ស៊ី។ អ៊ុយក្រែនបានអះអាងថា ដ្រូនមួយគ្រឿងបានវាយចំរោងចក្រ Togliattikauchuk ដែលផលិតកៅស៊ូសំយោគ និងសារធាតុបន្ថែមសម្រាប់ឥន្ធនៈ។
អាជ្ញាធររុស្ស៊ីបានអះអាងថា ខ្លួនបានបាញ់ទម្លាក់ដ្រូនអ៊ុយក្រែនប្រមាណ ២៣០គ្រឿង នៅតំបន់ជាច្រើនក្នុងប្រទេសរុស្ស៊ី រួមទាំងតំបន់ជុំវិញ Crimea និងសមុទ្រខ្មៅ។
ការវាយប្រហារទាំងនេះបង្ហាញថា រុស្ស៊ី និងអ៊ុយក្រែនកំពុងបន្តវាយប្រហារលើហេដ្ឋារចនាសម្ព័ន្ធឧស្សាហកម្មរបស់គ្នាទៅវិញទៅមក ដែលអាចប៉ះពាល់ដល់ការផលិត និងសមត្ថភាពផ្គត់ផ្គង់សម្រាប់សង្គ្រាម៕
