ក្រុមហ៊ូទីនៅយេម៉ែនបានអះអាងថា ខ្លួនបានវាយប្រហារមូលដ្ឋានយោធាSharurah នៅភាគខាងត្បូងប្រទេសសាអូឌីត ដោយប្រើមីស៊ីលបាលីស្ទិក និងដ្រូនជាច្រើនគ្រឿង។
ប្រភពពីសារព័ត៌មានTRT World នៅថ្ងៃទី១៣ខែកញ្ញា។
អ្នកនាំពាក្យយោធាហ៊ូទី លោក Yahya Saree បាននិយាយថា ការវាយប្រហារបានផ្តោតលើ ឃ្លាំងអាវុធ និងទីតាំងបញ្ជា និងគ្រប់គ្រង នៅក្នុងមូលដ្ឋាន។ លោកអះអាងថា មីស៊ីល និងដ្រូនបានវាយចំគោលដៅដែលបានកំណត់។
ក្រុមហ៊ូទីបាននិយាយថា ការវាយប្រហារនេះគឺជាការសងសឹកចំពោះការវាយប្រហារតាមអាកាសរបស់សាអូឌីតលើប្រទេសយេម៉ែន ហើយបានព្រមានថា ប្រសិនបើការវាយប្រហារលើយេម៉ែននៅតែបន្ត ខ្លួនអាចពង្រីកការវាយប្រហារទៅកាន់តំបន់ជ្រៅក្នុងប្រទេសសាអូឌីត។
រហូតមកដល់ពេលនេះ អាជ្ញាធរសាអូឌីតមិនទាន់បញ្ជាក់ជាផ្លូវការ អំពីការវាយប្រហារលើមូលដ្ឋាន Sharurah ទេ។ ប៉ុន្តែការពារជនស៊ីវិលសាអូឌីតបានរាយការណ៍ថា មានគ្រាប់មួយបានធ្លាក់នៅតំបន់ Al-Tuwal ក្នុងខេត្ត Jazan បណ្តាលឱ្យមនុស្ស ២នាក់រងរបួស និងបង្កការខូចខាតដល់វិហារអ៊ីស្លាម ផ្ទះប្រជាពលរដ្ឋ និងរថយន្តមួយចំនួន៕
