ការប្រយុទ្ធរវាងកងកម្លាំងរដ្ឋាភិបាលយេម៉ែននិងក្រុមហ៊ូទី កំពុងកាន់តែខ្លាំងនៅតំបន់ឆ្នេរសមុទ្រក្រហមភាគខាងលិចរបស់ប្រទេស។ ការវាយប្រហារតាមអាកាស និងការប្រយុទ្ធតាមដីបានបណ្តាលឱ្យមានអ្នកស្លាប់និងរបួសជាច្រើន ព្រមទាំងបង្ខំឱ្យប្រជាជនរាប់ម៉ឺននាក់ចាកចេញពីផ្ទះ។
ប្រភពពីសារព័ត៌មានAadolu Agency នៅថ្ងៃទី១៤ខែកញ្ញា។
អង្គការអន្តរជាតិទេសន្តរប្រវេសន៍ (IOM) បានឱ្យដឹងថា ចាប់ពីដើមខែកញ្ញាមក មនុស្សជាង ៨២,០០០នាក់ បានភៀសខ្លួនចេញពីខេត្ត Taiz, Hudaydah និង Lahij។ ក្នុងចំណោមនោះ មនុស្សជាង ២,០០០នាក់បានធ្វើដំណើរតាមសមុទ្រទៅដល់ប្រទេសជីប៊ូទី។
កងទ័ពយេម៉ែនបាននិយាយថា ខ្លួនបានវាយប្រហារតាមអាកាសទៅលើទីតាំង និងសម្ភារៈយោធារបស់ក្រុមហ៊ូទីនៅតំបន់ Mokha និង Dhubab។ ខាងហ៊ូទីវិញបានអះអាងថា ខ្លួនបានកាន់កាប់ទីក្រុងឆ្នេរ Mokha និងកំពង់ផែរបស់ទីក្រុងនេះ ព្រមទាំងកោះមួយចំនួននៅតំបន់សមុទ្រក្រហម។
ក្រុមកងកម្លាំងដែលគាំទ្ររដ្ឋាភិបាលបានអះអាងថា ក្នុងការប្រយុទ្ធចាប់ពីថ្ងៃទី៩ ខែសីហា ដល់ថ្ងៃទី១០ ខែកញ្ញា ទាហានរបស់ខ្លួនប្រមាណ ៥០០នាក់ស្លាប់ និង ១,៥០០នាក់រងរបួស ខណៈក្រុមហ៊ូទីក៏មានអ្នកស្លាប់ និងរបួសរាប់ពាន់នាក់ផងដែរ។
ដោយសារស្ថានការណ៍កាន់តែធ្ងន់ធ្ងរ អាជ្ញាធរនៅទីក្រុង Aden កំពុងរៀបចំ ជំរំថ្មីមួយសម្រាប់មនុស្ស ៣,០០០–៥,០០០នាក់ ដើម្បីផ្តល់ទីជម្រក និងសេវាសុខាភិបាលមូលដ្ឋានដល់គ្រួសារដែលភៀសខ្លួនពីតំបន់ប្រយុទ្ធ៕
