អ៊ីរ៉ង់បានឱ្យដឹងនៅថ្ងៃទី១៤ ខែកញ្ញា ឆ្នាំ២០២៦ថា កិច្ចប្រជុំរវាងអ៊ីរ៉ង់ និងប្រទេសតំបន់ឈូងសមុទ្រ ដើម្បីពិភាក្សាអំពីការគ្រប់គ្រងច្រកសមុទ្រ Hormuz ត្រូវបានពន្យារពេល ដោយសារស្ថានការណ៍កំពុងកើតឡើងនៅប្រទេសយេម៉ែន។
ប្រភពពីសារព័ត៌មានAl Jazeera។
អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បាននិយាយថា អ៊ីរ៉ង់ និងអូម៉ង់បានព្រមព្រៀងគ្នា ដើម្បីស្វែងរកវិធីសាស្ត្រដែលមានការទទួលខុសត្រូវក្នុងការគ្រប់គ្រងច្រកសមុទ្រនេះ។ លោកបញ្ជាក់ថា អារ៉ាប៊ីសាអូឌីតជាអ្នកស្នើឱ្យពន្យារពេលកិច្ចប្រជុំ។
លោក Baghaei ក៏បានបដិសេធថា អ៊ីរ៉ង់មិនមានទំនាក់ទំនង ឬជ្រៀតជ្រែកក្នុងស្ថានការណ៍ដែលកំពុងកើតឡើងនៅយេម៉ែនឡើយ។
ច្រកសមុទ្រ Hormuz មានសារៈសំខាន់ខ្លាំងសម្រាប់ការដឹកជញ្ជូនប្រេងនៅលើពិភពលោក ហើយបច្ចុប្បន្នច្រកនេះត្រូវបានរាយការណ៍ថា មានការរាំងស្ទះដោយអ៊ីរ៉ង់ ចំពេលមានសង្គ្រាមជាមួយអ៊ីស្រាអែល និងសហរដ្ឋអាមេរិក។
ជាមួយគ្នានេះ កងទ័ពបដិវត្តន៍អ៊ីរ៉ង់ (IRGC) បានអះអាងថា ខ្លួនបានស្ទាក់ចាប់ និងបំផ្លាញយន្តហោះដ្រូន MQ-1 មួយគ្រឿងនៅលើច្រកសមុទ្រ Hormuz៕
