ប្រព័ន្ធការពារដែនអាកាសរបស់អារ៉ាប៊ីសាអូឌីត បានស្ទាក់ចាប់និងបំផ្លាញដ្រូនមួយគ្រឿងដែលក្រុមហ៊ូធីនៅយេម៉ែនបានបាញ់បង្ហោះនៅជិតទីក្រុងមេក្កា កាលពីល្ងាចថ្ងៃអង្គារ។
ប្រភពពីសារព័ត៌មានAnadolu Agency នៅថ្ងៃទី១៦ខែកញ្ញា។
អ្នកនាំពាក្យក្រុមចម្រុះដែលដឹកនាំដោយអារ៉ាប៊ីសាអូឌីត លោក Turki al-Malki បាននិយាយថា ដ្រូនត្រូវបានស្ទាក់ចាប់នៅម៉ោងប្រហែល ៦:៥០ ល្ងាច មុនពេលវាចូលដល់តំបន់ដែនអាកាសហាមឃាត់។ បំណែកដ្រូនបានធ្លាក់នៅភាគខាងត្បូងទីក្រុងមេក្កា ហើយមិនមានការរាយការណ៍ពីអ្នកស្លាប់ ឬរបួសឡើយ។
លោកបានចាត់ទុកហេតុការណ៍នេះថា ជាការប៉ុនប៉ងលើកទី២ របស់ហ៊ូធីក្នុងការវាយប្រហារទៅលើមេក្កា ដោយលើកឡើងពីមីស៊ីលដែលត្រូវបានបាញ់សំដៅទៅទីក្រុងនេះកាលពីថ្ងៃទី២៧ ខែកក្កដា ឆ្នាំ២០១៧។
អារ៉ាប៊ីសាអូឌីតបានព្រមានថា សន្តិសុខវិហារបរិសុទ្ធទាំងពីរ និងអ្នកធ្វើធម្មយាត្រា គឺជាបន្ទាត់ក្រហម ហើយក្រុមចម្រុះនឹងចាត់វិធានការដើម្បីទប់ស្កាត់ការវាយប្រហារបន្ថែម។
ហេតុការណ៍នេះកើតឡើងមួយថ្ងៃបន្ទាប់ពីក្រុមចម្រុះបាននិយាយថា ការវាយប្រហារដោយមីស៊ីល និងដ្រូនរបស់ហ៊ូធីនៅទីក្រុង Khamis Mushait, Abha និង Taif បានបណ្តាលឱ្យជនស៊ីវិល ១៣ នាក់រងរបួស និងបំផ្លាញផ្ទះ ៧ ខ្នង និងយានយន្ត ២ គ្រឿង។
ភាពតានតឹងរវាងកងកម្លាំងរដ្ឋាភិបាលយេម៉ែន និងក្រុមហ៊ូធីបានកើនឡើងវិញចាប់តាំងពីដើមខែកក្កដា បន្ទាប់ពីមានភាពស្ងប់ស្ងាត់អស់រយៈពេលជាច្រើនឆ្នាំ៕
