(កំពង់ឆ្នាំង)៖ នៅព្រឹកថ្ងៃទី១៧ ខែកញ្ញា ឆ្នាំ២០២៦ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអញ្ជើញជាអធិបតីសម្ពោធដាក់ឱ្យដំណើរការរោងចក្រផ្គុំ និងដំឡើងរថយន្តរបស់ក្រុមហ៊ុន ធីអេច អូតូម៉ូធីវមេនូហ្វេកធឺរីង ឯ.ក (TH Automotive Manufacturing Co.,Ltd.) និងខ្សែច្រវាក់ផលិតកម្មរថយន្តម៉ាកGAC។
ក្រុមហ៊ុននេះ មានទីតាំងស្ថិតនៅលើផ្លូវជាតិលេខ៥ ភូមិខ្នាយកកោះ ឃុំសែប ស្រុកកំពង់ត្រឡាច ខេត្តកំពង់ឆ្នាំង លើផ្ទៃដីសរុប១១ហិកតា ក្នុងនោះផ្ទៃរោងចក្រមាន ២.៧ហិកតា ក្រៅពីនោះ គឺជាអគារការិយាល័យ ទីធ្លា និងផ្លូវ។
ពិធីនេះ ក៏មានការអញ្ជើញចូលរួមពីមន្ត្រីជាន់ខ្ពស់ នៃរាជរដ្ឋាភិបាលកម្ពុជា ថ្នាក់ដឹកនាំខេត្តកំពង់ឆ្នាំង និងបណ្តាខេត្តមានព្រំប្រទល់ជាប់ខេត្តកំពង់ឆ្នាំងមួយចំនួនទៀត ព្រមទាំងថ្នាក់ដឹកនាំក្រុមហ៊ុន និងបុគ្គលិក កម្មករ និយោជិតរបស់ក្រុមហ៊ុនជាច្រើនរូប។
អ្នកជំនួញនៅកម្ពុជាជាច្រើនរូប ក៏ត្រូវបានអញ្ជើញជាភ្ញៀវកិត្តិយសក្នុងពិធី។
ក្រុមហ៊ុន ធីអេច អូតូម៉ូធីវ មេនូហ្វេកធឺរីង ឯ.ក (TH Automotive Manufacturing Co.,Ltd.) គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនមេ TH Group ដែលបានបង្កើតឡើងក្នុងឆ្នាំ១៩៩៧ អ្នកឯកទេសផ្នែកយានយន្តនៅកម្ពុជា។
ក្រុមហ៊ុនទទួលបានអាជ្ញាបណ្ណដំណើរការរោងចក្រដំឡើងរថយន្ត និងពិធីចុះហត្ថលេខាទទួលសិទ្ធិផ្តាច់មុខពីក្រុមហ៊ុន GAC International Co.,Ltd. ដំឡើងរថយន្តម៉ាក GAC នៅកម្ពុជា កាលពីថ្ងៃទី១៩ ខែកញ្ញា ឆ្នាំ២០២៥ និងបង្កើតឡើងដោយវិនិយោគិនខ្មែរ១០០ភាគរយ។
គម្រោងវិនិយោគរបស់ក្រុមហ៊ុន គឺរោងចក្រផ្គុំ និងដំឡើងរថយន្តម៉ាក GAC និងរថយន្តម៉ាក CHEVROLET ដែលមានសមត្ថភាពផលិតសរុបប្រមាណ ២០ ០០០គ្រឿងក្នុងមួយឆ្នាំ សម្រាប់បម្រើឱ្យទីផ្សារក្នុងស្រុក ៩០ភាគរយ និងនាំចេញ១០ភាគរយ ដោយប្រើប្រាស់ទុនវិនិយោគសរុបប្រមាណ ១៩ ៣០០ ០០០ដុល្លារអាម៉េរិក និងប្រើប្រាស់កម្លាំងក្នុងស្រុកសរុបចំនួន ២៥០នាក់ ស្រី២០នាក់ និងអ្នកបច្ចេកទេសបរទេស ២នាក់។
ដោយមានការជួយជ្រោមជ្រែង និងគាំទ្រពីរាជរដ្ឋាភិបាល ក្រសួង ស្ថាប័នពាក់ព័ន្ធ ព្រមទាំងអាជ្ញាធរមូលដ្ឋានផងនោះ បន្ទាប់ពីក្រុមហ៊ុនដាក់ដំណើរការសាកល្បងនៅថ្ងៃទី៨ ខែមីនា ឆ្នាំ២០២៦ រហូតមកដល់បច្ចុប្បន្នក្រុមហ៊ុនដំឡើងសាកល្បងបានរថយន្តសរុប ២១៣គ្រឿង៕
