ឥណ្ឌាបានព្រមានសហរដ្ឋអាមេរិកថា វិធានការពន្ធថ្មីដែលដាក់ទៅលើប្រទេសដែលបន្តទិញប្រេងពីរុស្ស៊ី អាចប៉ះពាល់ដល់ទំនាក់ទំនងរវាងប្រទេសទាំងពីរ។ ការព្រមាននេះកើតឡើង បន្ទាប់ពីសភាតំណាងរាស្ត្រអាមេរិកបានអនុម័តច្បាប់ដាក់ទណ្ឌកម្មថ្មីលើរុស្ស៊ី។
ប្រភពពីសារព័ត៌មានReuter នៅថ្ងៃទី១៧ខែកញ្ញា។
ច្បាប់នេះផ្តល់សិទ្ធិឱ្យប្រធានាធិបតីអាមេរិក ដូណាល់ ត្រាំ អាចដាក់ពន្ធរហូតដល់ ១០០% លើប្រទេសដូចជា ឥណ្ឌា និងចិន ប្រសិនបើប្រទេសទាំងនេះបន្តពឹងផ្អែកលើប្រេង និងឧស្ម័នរុស្ស៊ី។
ក្រសួងការបរទេសឥណ្ឌាបាននិយាយថា ឥណ្ឌានឹងបន្តទិញប្រេងពីប្រភពផ្សេងៗ ដើម្បីធានា សន្តិសុខថាមពល និងរក្សាការផ្គត់ផ្គង់ប្រេងដែលមានតម្លៃសមរម្យសម្រាប់ប្រជាជន។ ឥណ្ឌាក៏បានបញ្ជាក់ថា ខ្លួននឹងចាត់វិធានការដើម្បីការពារផលប្រយោជន៍ពាណិជ្ជកម្ម និងសេដ្ឋកិច្ចរបស់ខ្លួន។
សូមបញ្ជាក់ថា៖ ឥណ្ឌាគឺជាប្រទេសនាំចូលប្រេងធំជាងគេមួយរបស់ពិភពលោក ហើយជាអ្នកទិញប្រេងរុស្ស៊ីដ៏សំខាន់។ ដូច្នេះ ប្រសិនបើពន្ធថ្មីត្រូវបានអនុវត្ត វាអាចបង្កើនសម្ពាធលើរោងចក្រចម្រាញ់ប្រេង និងធ្វើឱ្យការចរចាពាណិជ្ជកម្មរវាង ឥណ្ឌា និងអាមេរិក កាន់តែស្មុគស្មាញ៕
