បេសកកម្មស៊ើបអង្កេតរបស់អង្គការសហប្រជាជាតិ (UN) បាននិយាយថា មានមូលហេតុសមហេតុផលដើម្បីជឿថា កងកម្លាំងអាមេរិកនៅពីក្រោយការវាយប្រហារយោធា២លើក លើសាលារៀនមួយ និងមជ្ឈមណ្ឌលកីឡាមួយនៅអ៊ីរ៉ង់កាលពីខែកុម្ភៈ ដែលការវាយប្រហារទាំងនេះអាចចាត់ទុកជាឧក្រិដ្ឋកម្មសង្គ្រាម។
ប្រភពពីសារព័ត៌មានReuter នៅថ្ងៃទី១៧ខែកញ្ញា។
បន្ថែមពីនេះករណីធ្ងន់ធ្ងរមួយគឺការវាយប្រហារលើ សាលាបឋមសិក្សា Shajareh Tayyebeh នៅទីក្រុង Minab ដែលអាជ្ញាធរអ៊ីរ៉ង់និយាយថា មានមនុស្សជាង ១៥០នាក់ស្លាប់ ក្នុងនោះប្រហែល ១២០នាក់ជាកុមារសិស្សសាលា។ បេសកកម្ម UN បានសន្និដ្ឋានថា ការវាយប្រហារនេះមិនបានបែងចែកឱ្យច្បាស់រវាងគោលដៅយោធា និងជនស៊ីវិល ហើយបណ្តាលឱ្យជនស៊ីវិលស្លាប់ និងហេដ្ឋារចនាសម្ព័ន្ធស៊ីវិលខូចខាត។
ជាមួយគ្នានេះ បេសកកម្ម UN ក៏បានរកឃើញថា អាជ្ញាធរអ៊ីរ៉ង់បានប្រព្រឹត្តអំពើដែលអាចជាឧក្រិដ្ឋកម្មប្រឆាំងមនុស្សជាតិ ក្នុងការបង្ក្រាបបាតុកម្មប្រឆាំងរដ្ឋាភិបាល។ របាយការណ៍បានរៀបរាប់ពីការសម្លាប់ ការធ្វើទារុណកម្ម ការឃុំខ្លួនដោយបំពាន និងការធ្វើទុក្ខបុកម្នេញលើក្រុមអ្នកតវ៉ា។
អាមេរិក និងអ៊ីរ៉ង់មិនទាន់ឆ្លើយតបភ្លាមៗចំពោះរបាយការណ៍នេះទេ។ មុននេះ មន្ត្រីអាមេរិកបាននិយាយថា ប្រតិបត្តិការយោធារបស់ខ្លួនធ្វើឡើងស្របតាមច្បាប់សង្គ្រាម ខណៈអ៊ីរ៉ង់បានបដិសេធការចោទប្រកាន់អំពីការរំលោភសិទ្ធិមនុស្សជាប្រព័ន្ធ៕
