ប្រជាជនយេម៉ែនជាច្រើនបានជិះទូកឆ្លងសមុទ្រក្រហម ដើម្បីគេចចេញពីការប្រយុទ្ធរវាងក្រុមហ៊ូទីដែលគាំទ្រដោយអ៊ីរ៉ង់ និងកងកម្លាំងដែលគាំទ្រដោយអារ៉ាប៊ីសាអូឌីត។ ការប្រយុទ្ធកាន់តែខ្លាំងឡើង ខណៈសង្គ្រាមនៅមជ្ឈិមបូព៌ារីករាលដាល និងបង្កការព្រួយបារម្ភអំពីការផ្គត់ផ្គង់ប្រេងពិភពលោក។
ប្រភពពីសារព័ត៌មានReuter នៅថ្ងៃទី១៧ខែកញ្ញា។
អង្គការអន្តរជាតិសម្រាប់ការធ្វើចំណាកស្រុក (IOM) បានឱ្យដឹងថា មនុស្សជាង ១០០,០០០នាក់នៅយេម៉ែនត្រូវបានបង្ខំឱ្យចាកចេញពីផ្ទះ ដោយភាគច្រើនភៀសខ្លួនទៅកាន់តំបន់ផ្សេងៗក្នុងប្រទេស។
អ្នកភៀសខ្លួនមួយចំនួនបានឆ្លងសមុទ្រក្រហមទៅកាន់ទ្វីបអាហ្វ្រិក។ បុរសម្នាក់ឈ្មោះ Ahmad Hassan អាយុ ៧០ឆ្នាំ បានប្រាប់ IOM ថា ការធ្វើដំណើរតាមទូកមានសភាពលំបាក ដោយសមុទ្ររលកខ្លាំង និងកុមារជាច្រើនមានអាការៈវិលមុខ។
ក្រុមហ៊ូទីបានអះអាងថា អារ៉ាប៊ីសាអូឌីតបានធ្វើការវាយប្រហារតាមអាកាសរាប់រយលើកនៅតំបន់ជិតព្រំដែន។ ក្រុមហ៊ូទីក៏បានអះអាងថា ខ្លួនបានបាញ់ទម្លាក់យន្តហោះចម្បាំង Saudi F-15 មួយគ្រឿង ហើយបានផ្សព្វផ្សាយវីដេអូបង្ហាញសំណល់យន្តហោះដែលឆេះ៕
