(ភ្នំពេញ)៖ អង្គភាពប្រឆាំងអំពើពុករលួយ(ACU)បានឃាត់ខ្លួនលោក រៀម រុំ មេឃុំព្រែកខ្សាច់ ជំទប់ម្នាក់និងមនុស្ស២នាក់ទៀតសរុបចំនួន៤នាក់ នៅស្រុកគិរីសាគរ ខេត្តកោះកុង ពាក់ព័ន្ធនឹងបទល្មើសស៊ី សំណូក ដឹកនាំនិងរៀបចំទីតាំងឱ្យក្រុមឧក្រិដ្ឋជនប្រព្រឹត្តបទល្មើស(ឆបោក)តាមប្រព័ន្ធបច្ចេកវិទ្យា(Onlin Scams) នៅក្នុងមូលដ្ឋានរបស់ខ្លួន។
ជាមួយគ្នានេះACU ក៏បានបញ្ជូនក្រុមជនសង្ស័យ ទៅកាន់សាលាដំបូងរាជធានីភ្នំពេញផងដែរ.!។
*នេះបើយោងតាមការឱ្យពីភ្នាក់ងារ”ដើមរាំង”ប្រចាំខេត្តកោះកុង!។
*តំណាងអយ្យការអមសាលាដំបូងរាជធានីភ្នំពេញ នៅថ្ងៃទី១៨ ខែកញ្ញា ឆ្នាំ២០២៦ បានចេញសេចក្តីប្រកាសព័ត៌មាន ចោទប្រកាន់ជនសង្ស័យខាងលើជាផ្លូវការដូចខាងក្រោម៖
ទី១៖ ឈ្មោះ រៀម រុំ មេឃុំព្រែកខ្សាច់ ស្រុកគិរីសាគរ(ឃាត់ខ្លួន) ពីបទស៊ីសំណូក សមគំនិតក្នុងអំពើរៀបចំ ឬដឹកនាំមជ្ឈមណ្ឌល ឆបោកតាមប្រព័ន្ធបច្ចេកវិទ្យា និងសម្អាតប្រាក់ តាមមាត្រា ៣២ នៃច្បាប់ស្តីពីការប្រឆាំងអំពើពុករលួយ មាត្រា២៩ និងមាត្រា ៥៩៤ នៃក្រមព្រហ្មទណ្ឌ មាត្រា៦ និងមាត្រា៩ នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទាន ភេរវកម្ម។
ទី២៖ ឈ្មោះ ជា វាសនា ភេទប្រុស (ឃាត់ខ្លួន) និងឈ្មោះ ជា សុទ្ធ ហៅម៉េង ភេទប្រុស(កំពុងជាប់ឃុំ) ពីបទសមគំនិតក្នុងអំពើស៊ីសំណូក សមគំនិតក្នុងអំពើរៀបចំ ឬ ដឹកនាំមជ្ឈមណ្ឌលឆបោកតាមប្រព័ន្ធបច្ចេកវិទ្យា និងសមគំនិតក្នុងអំពើសម្អាតប្រាក់ តាមមាត្រា ៣២ នៃច្បាប់ស្តីពីការប្រឆាំងអំពើពុករលួយ មាត្រា២៩ និងមាត្រា ៥៩៤ នៃក្រមព្រហ្មទណ្ឌ, មាត្រា៦ និងមាត្រា៩ នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា និងមាត្រា៣៨ នៃច្បាប់ស្តីពីការប្រឆាំង ការសម្អាតប្រាក់ និងហិរញ្ញប្បទានភេរវកម្ម។
ទី៣៖ ឈ្មោះ ចាង ចៀនឈាំង (ZHANG JIAN QIANG) ហៅ ឆៃ យ៉ូវយៀន (Cai You Yuan) ហៅត្រង៉ោលភេទប្រុស ជនជាតិចិន និង បក្សពួក (គេចខ្លួន) ពីបទសូកប៉ាន់, ឆបោកតាមប្រព័ន្ធបច្ចេកវិទ្យា រៀបចំ ឬដឹកនាំមជ្ឈមណ្ឌល ឆបោកតាមប្រព័ន្ធបច្ចេកវិទ្យា និងបទសម្អាតប្រាក់ តាមមាត្រា៣២ នៃច្បាប់ស្តីពីការប្រឆាំងអំពើពុករលួយ មាត្រា៦០៥ នៃក្រមព្រហ្មទណ្ឌមាត្រា៥ មាត្រា៦ និងមាត្រា ៩នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា និងមាត្រា៣៨ នៃច្បាប់ ស្តីពី ការប្រឆាំង ការសម្អាតប្រាក់ និងហិរញ្ញប្បទានភេរវកម្ម៕
